Sikop sa buy-bust sa motel

CEBU, Philippines - Nasakmit ang mokabat sa P1 milyon nga shabu gikan sa duha ka pusher nga nadakpan sa managlahing buy-bust operation sa kapolisan sa Dakbayan sa Lapu-Lapu diin usa sa transaksiyon sa sulod sa motel.

Si Senior Inspector Felix Cleopas III sa Lapu-Lapu City Police Office (LLCPO) niila sa nasakpan sa sulod sa motel sa Barangay Pajo nga si Reynaldo alyas Dodong Amores Lumar, 45, taga Barangay Gun-ob, ug giingong high value target nga drug pusher sa siyudad.

Ilang nasakmit ang duha ka medium-size nga shabu nga mokabat sa P120, 320 ug buy-bust money nga P1,000.

Samtang sa Sitio Matumbo, Pusok nadakpan sa buy-bust operation ang usa ka lalaki nga si Kenneth Cabanlit Figues alyas Ken-Ken, 29-anyos.

Nasakmit gikan sa dinakpan ang 18 ka gagmay nga pakete sa shabu ug kahimanan sa paggamit niini.

Ang operasyon gipasiugdahan sa LLCPO Station 3 Drug Enforcement Unit, City Intelligence Branch ug City Drug Enforcement Unit (CDEU).

Samtang ang Philippine Drug Enforcement Agency nipahigayon sab og buwag nga operasyon sa usa ka drug den sa Barangay Pajo sa maong dakbayan niadtong Lunes sa gabii kauban sa Drug Enforcement Unit sa siyudad.

Ang nagpadagan sa drug den giila nga si May Ann Baguio Hipolito, 21, residente sa maong dapit, diin naaktuhan nga nanuyop og shabu sila si Jane Rose Pinote Mangubat, 28; Alvin Pinote Monterola, 26; Wilmar Salarda Cuizon, 20, ug usa ka 17-anyos nga babaye nga pulos residente sa maong lugar.

Nakuha gikan sa mga dinakpan ang siyam ka pakete sa gidudahang shabu nga mokabat sa P113,000.

Si Leia Albiar, information officer sa PDEA-7, niingon nga modus ni Hipolito ang pagpangabang og mga lawak sa boarding house diin ang usa niini himuong suyopanan.

Dugang intelligence report nagbutyag nga may mga suki sab si Hipolito sa ubang sitio sa Barangay Pajo ug Gun-ob.

Si Albiar niingon nga matawag na nga usa ka high value target si Hipolito kinsa naghilak nga nihimakak sa pasangil.

Supplier sikop

Sa Dakbayan sa Sugbo, nasikop sa mga sakop sa City Intelligence Branch ang duha ka high value target kagahapon sa kadlawon sa managlahing buy-bust operation sa Tres de Abril, Labangon ug sa Magsaysay St., Suba. Unang target si Steven Cabreros Cavan alyas Dwight, 31, taga M. Dela Concepcion St., Pasil, kinsa nakuhaan  og usa ka gamay ug siyam ka medium nga pakete sa shabu nga mokabat sa P157,640.

Matud ni Chief Inspector Ramoncillo Sawan, information officer sa Cebu City Police Office, nga sa Pasil nagpuyo si Cavan apan sa Labangon kini namaligya ug may koneksyon ni Melchor Ocarol, usa ka kanhi drug pusher kinsa nadakpan sa niaging tuig.

Ikaduhang nasikop sa Suba si John Risty Abellana Lupian alyas John-john, 20-anyos.

Si Sawan niingon nga si Lupian pag-umangkon sa dinakpan nga si Archie Abellana kinsa gikatahong kakonsabo ni Ocarol.

Nakuha gikan ni Lupian ang duha ka gamay, duha ka medium ug usa ka dako nga pakete sa shabu nga mokabat sa P119,272.

Si Sawan niingon nga si Cavan maoy supplier ni Lupian.

Merkado suyopanan

Sa Dakbayan sa Talisay, gihimong suyopanan ang karaang merkado sa Lagtang.

Kini sumala pa ni SPO1 Jeffrey Diola sa Talisay City Police Station human sa ilang operasyon batok sa inilang tigpayuhot og ginadiling drugas sa maong lugar.

Si Diola ug kaubanan ang nipahigayon og buy-bust operation batok ni Stella Cabajar, hingkod ang panuigon, dalaga nga nagpuyo sa maong lugar.

Apan pakyas ang mga operatiba sa pagsikop ni Cabajar human nakamatikod nga polis ang iyang gikasabot hinungdan nga nakasibat kuyog sa kauban nga si Joshua suot sa karaang merkado.

Hinoon ilang nasikop ang spotter nga si Noli Cabrera Jr., alyas Lagom, 52-anyos.

Ang merkado sa Lagtang gihimong evacuation center sa mga taga Barangay Tangke nga nabiktima sa sunog sa niaging buwan.

Ang kapolisan sa Siyudad sa Talisay nakadawat og pasidungog gikan sa Police Regional Office-7 niadtong Lunes isip adunay labing daghang operasyon may labot sa paggukod sa mga tawo nga nalambigit sa ginadiling drugas sa tibuok Probinsiya sa Sugbo.

Gipasigarbo ni Supt. Emerson Dante, hepe sa kapolisan sa dakbayan, ang iyang mga sakop nga wala’y puas sa pagtrabaho.

Sulod sa buwan sa Enero hangtud Abril aduna sila’y nasakmit nga drugas nga moabot sa P4.3 milyones ang kantidad. Romeo T. Limpangog, Shaine L. Maniego, Camille L. Pateres, Rowena D. Capistrano ug Gabriel C. Bonjoc (BANAT NEWS)