VG Magpale gihulga sab

CEBU, Philippines - Gawas sa pangulo sa Cebu Provincial Anti-Drug Abuse Office, nakadawat sab og hulga sa kinabuhi si Bise Gobernador Agnes Magpale. Apan dili sama kang kanhi bokal Carmen Remedios Durano-Meca nga pangulo sa CPADAO, kang Magpale dili direkta ang paghulga kaniya ug giagi sa iyang mga tawo.

Ang bise gobernador nagkanayon nga hayan may kalambigitan sa kontrobersiya sa Cebu Provincial Detention and Rehabilitation Center ang iyang kaso.

Si Magpale nipahigayon og imbestigasyon sa CPDRC human madawat ang report nga adunay mga priso nga padayon pa nag-operate og cyberpornography sulod sa prisohan.

Ang bise gobernador wala na mohatag og dugang detalye sa paghulga kaniya ug nagkanayon nga wala silay mahimo niini kun dili magmabinantayon ug magpadayon gihapon sila sa ilang trabaho.

Si Gob. Hilario Davide III nihangyo na sa Cebu Provincial Police Office nga hatagan og dugang security personnel si Meca nga nakadawat og hulga sa iyang kinabuhi niadtong Agosto 13.

Samtang gihagit sa director sa Police Regional Office-7 ang mga tawo nga nagpaluyo sa pagpanghulga kang Meca ug sa hepe sa Danao City Police Station nga siya na lang ang atubangon.

Dungan kang Meca, si Senior Inspector Alejandro Batobalonos sa Danao City Police Station ang nakadawat sab og hulga pinaagi sa cellphone human napatay sa iyang mga sakop ang igsuon ni Alvaro Alvaro alyas Barok nga si Medz Alvaro atol sa buy-bust operation.

Si Chief Supt. Noli Taliño niingon nga iyang atubangon ang tanan nga tawo nga nanghulga.

Matud ni Taliño nga duna nay usa ka team sa Regional Public Safety Battalion ang gidugang karon sa Danao City Police aron madugangan ang pwersa sa kapolisan sa maong siyudad.

Si Taliño niingon nga andam sila motabang sa mga tawo nga nakadawat og pagpanghulga. Le Phyllis F. Antojado ug Jojo C. Ugdol (BANAT NEWS)