PO1 Roa pasidunggan

CEBU, Philippines - Hatagan og pasidungog sa Police Regional Office-7 ug Cebu City Police Office si PO1 Mark Wilson Roa human nag-trending sa Facebook ang iyang hulagway nga mitabang sa usa ka senior citizen sa pag-ilis sa ligid sa sakyanan nga  na-flat.

Matud ni Chief Insp. Enrique Belciña, hepe sa Police Community Relations sa CCPO, nga planong hatagan og commendation ni Sr. Supt. Noli Romana ang maong polis human sa flag ceremony karong Lunes.

“Sa ato nga level dinhi sa city, commendation lang ang atong mahatag pero nagplano sab ang PRO-7 nga hatagan siya og medalya,” matud ni Belciña. Dugang ni Belciña nga ang gibuhat ni Roa usa ka maayong buhat bisan may kasagmuyo sila sa ubang komento sa Facebook nga nagsaway niini.

Hangtud karon daw sa dili pa makatuo si Roa sa sunod-sunod nga pasalamat ug pagdayeg nga iyang nadawat gikan sa ilang mga paryente, silingan, labi na sa mga opisyal sa kapolisan sa dakbayan ug sa rehiyonal nga buhatan.

Sa pakighinabi sa Banat News ngadto ni Roa, kini mipadayag sa pagpasalamat diin unang nigawas ang estorya kabahin sa iyang pagtabang sa usa ka 75-anyos nga lalaki sa may Carmelite Monastery niadtong Hulyo 15.

Matud ni Roa nga atol sa paggawas sa isyu sa Banat News, gipakyaw gyud og palit sa ilang lolo ug mga silingan ang mga kopya.

“Hurot gyud ang Banat News ato sir kay nakita man nila nga naa ko sa balita, salamat kaayo sa inyong pagsulat sir, wala ko nagtuo nga ingon ani ang pasalamat nga madawat nako, wala gyud ko nag-expect, sangko sa langit ang kalipay nako,” matud ni Roa.

Ang iyang gitabangan naila nga si Orlando Enoveso, 75, nga maoy nag-post sa iyang hulagway aron sa pagpasalamat sa gibuhat ni Roa.

Si Roa bag-o pa lang nakasulod sa pagka-polis ug gani ubos pa kini sa field training program ug kasamtangang nadestino sa Mabolo Police Station.- (/GMR)(BANAT NEWS)