‘Flame effect’ lumitaw habang nagdarasal si Cayetano
MANILA, Philippines — Ipinag-utos ni Senate impeachment court presiding officer Sen. Francis Escudero sa Clerk of Court na alisin ang “flame transition effect” na lumabas sa screen habang isinasagawa ni Senate Minority Leader Alan Peter Cayetano ang opening prayer sa pagsisimula ng livestream ng impeachment trial.
Inatasan din ni Escudero ang Clerk of Court na paalalahanan ang Public Relations and Information Bureau (PRIB) na maging mas maingat sa paggamit ng mga transition effect sa mga susunod na broadcast ng pagdinig.
Ayon kay Escudero, hindi angkop ang naturang visual effect sa isang seryoso at pormal na proseso gaya ng impeachment trial dahil maaaring magbigay ito ng maling impresyon sa publiko.
Bukod dito, ipinag-utos din niya na alisin at baguhin ang anumang kaparehong flame effect na nakapaloob sa opisyal na rekord ng impeachment court.
Samantala, humingi na rin ng paumanhin ang PRIB kaugnay ng insidente na naganap sa opening prayer ni Cayetano sa ika-44 na araw ng impeachment trial ni Vice President Sara Duterte.
“We sincerely apologize for the accidental transition effect that appeared during the livestream of the Senate Impeachment Court proceedings today. The incident was due to an unexpected technical issue during the broadcast, which we deeply regret,” pahayag ng PRIB.
- Latest
















