Top 3 most wanted sikop sa kapolisan sa Labangon

CEBU, Philippines — Nadakpan sa Labangon Police Station sa Cebu City Police Office pinasikad sa warrant of arrest ang top 3 most wanted person regional level diha sa Sitio Beltran, Barangay Quiot, Siyudad sa Sugbo niadtong Huwebes sa gabii.

Ang suspetsado mao si Alvin Alegato alyas “Alvin”, 27-anyos, residente sa Sitio Coles, Barangay Quiot niining siyudad.

Ang tracker team sa Labangon Police Station pinangulohan ni Police Lieutenant Raymart Rabanes ang nakadakop sa suspetsado dihang nahibaw-an nila nga nasigpatan kini diha sa dapit.

Nasayran nga si Alegato adunay warrant of arrest sa kasong murder kinsa si Regional Trial Court (RTC) Judge Dante Corminal sa Branch 16 sa Dakbayan sa Sugbo ang niisyu sa warrant of arrest batok sa suspetsado nga dunay petsa nga Marso 25, 2024.

Ang korte walay gitugot nga piyansa alang sa temporaryong kagawasan sa suspetsado.

Si Alegato nagtingkagol karon sa custodial facility ug gikatakda kini ipresentar ngadto sa korte. (BANAT NEWS)