Managkapuyo nadakpan sa drugbust

CEBU, Philippines — Nasikop ang managkapuyo nga gidudahang nalambigit sa ilegal nga drugas human sa gipahigayon nga buy-bust operation sa Sitio Guiwanon, Barangay Poblacion, Dalaguete kagahapon sayo sa buntag adlaw nga Lunes.

Ang mga dinakpan kansang mga pangalan gitago sa kapolisan parehong nag-edad og 31-anyos ug mga residente sa Lungsod sa Dalaguete.

Ang Drug Enforcement Unit sa Dalaguete Police Station maoy nipahigayon sa buy-bust operation nga gipangulohan ni Police Major Kenneth Paul Albotra, hepe sa maong police station.

Ang mga dinakpan nasakmitan og 12.06 gramo nga gituohang shabu nga mobalor og P83 mil, cellphone, ug buy-bust money.

Samtang nasakmit sa kapolisan sa Lapu-Lapu City Police Office (LCPO) ang 65.60 gramo nga gituohang shabu nga nagkantidad og P 446,080 gikan  sa unom ka mga pushers nga gilangkoban sa usa ka High Value Individual (HVI) ug lima ka mga Street Level Individual (SLI).

Nadakpan sila sud sa usa ka semana nga Simultaneous   Anti- Criminality Law Enforcementy Operation (SACLEO)  nga nagsugod sa Mayo  18   hangtod sa Mayo 24, 2024. Si Police Lieutenant Colonel  Christian Torres,  tigpamaba  sa LCPO  miingon  nga ang pagkasikop  sa unom ka mga suspetsado resulta sa gihingusgan nilang operasyon  batok ilegal nga drugas.

Gisusi nila karon ang tinubdan sa shabu nga gidala sa mga suspetsado.

Si  Police  Colonel  Ali  Barron, Officer-In-Charge  (OIC) director  sa LCPO mi-ingon nga ang pagpakang sa ilegal nga drugas ilang  gipaningkamotan  alang sa pagmentinar sa kahapsay ug kalinaw.

Si Barron  miingon nga ang ilegal nga drugas maoy nag-una nga hinungdan sa mga krimen nga mahitabo sama sa tulis, pagpangawat, pagpanglabni ug pagpatay nga sagad kini mahitabo sa higayon nga ang mga nalambigit niini  magumon na sa paggamit sa ilegal nga drugas. (BANAT NEWS)