Bucks tinapos ang 2-dikit na kamalasan
ATLANTA — Nagsalpak si Giannis Antetokounmpo ng anim na matitinding dunks at tumapos na may 36 points para banderahan ang Milwaukee Bucks sa 122-113 pagsuwag sa Hawks.
Humakot din si Antetokounmpo ng 16 rebounds at 8 assists habang may 21 markers si Khris Middleton para tapusin ng Milwaukee (47-27) ang kanilang two-game losing skid.
Humataw si Bogdan Bogdanovic ng 38 points sa panig ng Atlanta (34-40) na nagwakas ang four-game winning streak.
Nagdagdag si Dejounte Murray ng 20 points, 12 assists at 8 rebounds para sa Hawks na nakalapit sa 89-94 agwat sa fourth period bago nagsalpak sina Middleton at Brook Lopez ng magkasunod na triples na muling naglayo sa Bucks.
Sa New Orleans, kumamada si Jayson Tatum ng 23 points at nakabangon ang Boston Celtics (58-16) mula sa magkasunod na kabiguan sa 104-92 paggupo sa Pelicans (45-29).
Sa Orlando, tumipa si Wendell Carter Jr. ng 15 points at 13 rebounds at may tig-15 markers sina Jalen Suggs at Cole Anthony sa 118-88 panalo ng Magic (43-31) sa Memphis Grizzlies (24-50).
- Latest
