Bugno sa mga pating
Kon tinuod ang sulti ni Orly Guteza nga gipugos ug gisaaran siya og kuwarta nilang kanhi Kongresista Mike Defensor ug Senador Rodante Marcoleta sa pagpirma og affidavit batok ni kanhi House Speaker Martin Romualdez sa Septiyembre sa niaging tuig, unsa may garantiya nga wala siya pugsa ug gisaaran og mas dakong kuwarta sa pagpirma sa bag-ong affidavit sa niaging semana nga ni-absuwelto nang Romualdez gikan sa flood control scandal?
Sa niaging tuig, gipasanginlan si Guteza nga gigamit sa mga kaatbang ni Romualdez. Karon gipasanginlan nga nagpagamit na sab ni Romualdez.
-o0o-
Abunda ang mga sukaranan sa mga pagduda nga ang makalilisang nga kuwarta ug impluwensya ni Romualdez maoy nakapabali nilang Guteza ug sa laing upat ka kanhi marines:
Una, ang bag-ong affidavits sa upat ka kanhi marines nga gipirmahan niadtong Agosto 7 gisukip dayong Romualdez sa iyang counter affidavit nga gisumiter ngadto sa buhatan sa Ombudsman sa samang adlaw; ug
Ikaduha, ang bag-ong affidavit nga gipirmahan ni Guteza niadtong Agosto 13 gisukip sab dayon ni Romualdez sa iyang supplemental counter affidavit nga iyang isumiter ngadto sa Ombudsman karong semanaha.
-o0o-
Kon nibalitok na silang Guteza ug kaubanan, dili kaha mosunod og likoy ang uban pang mga saksi sa Ombudsman sa uban pang flood control cases batok sa ubang mga sinumbong nga, samtang dili sama kalig-on ni Romualdez, wala sab mabantog sa ilang kaligdong?
Kon wala kaluwas ang Ombudsman sa upat ka kanhi marines gikan sa tentasyon sa gidudahang mga suburno, unsa may ilang katakos sa pagpanalipod sa nag-unang mga testigo nga gipaubos sa witness protection program?
-o0o-
Nidemanda ang katawhan nga ang labing dagkong isda ang masikop ug masilotan sa giisip nga labing grabeng kinawatay sa kasaysayan. Karon ato nang nadiskubrehan ang higanteng bawod sa mga maniobra nga mamugna kon ang mga pating nay magbugno.
Maong dili dayon ta molayat sa paghangop sa mga paukyab nga matinud-anon ang mga imbestigasyon batok sa labing dagkong kawatan. Ato unang susihon para ba gyod sa pagbawi sa kinawat nga kuwarta sa katawhan. O brasohay lang sa politika nga ang mga nagtungkawo sa gahom ra gihapon ang mabulahan. Ug sama sa naandan binlan lang og buslot nga buyot ang kinabag-an.
- Latest
