Mga ungo sa MCWD?
Angayng magbantay si Cebu City Mayor-elect Nestor Archival: Ang bisan unsa niyang plano sa pagtarong sa Metro Cebu Water District (MCWD) molampos lang kon iyang mabungkag ang grupo nga nagkontrolar sa kontrobersiyal nga mga transaksiyon sa water district sa niaging tulo na ka administrasyon.
Ang grupo ni kanhi presidential assistant Mike Dino nagsugod pagdominar sa MCWD atol sa pamunoan ni anhing Mayor Edgar Labella, gisuwayan pagbadlong pero igo lang nilipat-lipat ni kanhi Mayor Mike Rama ug nisamot paglig-on ubos nilang outgoing Mayor Raymond Garcia ug outgoing Governor Gwen Garcia.
-o0o-
Sakop sa grupo ni Dino silang kanhi MCWD chairman Joey Daluz (kinsa nagpalaban ni Gwen dihang gisuwayan pagpalagpot ni Rama pinaagi sa Local Water Utilities Administration) ug Raymond (kinsa nagyampongad sa upisina ni Dino atol sa administrasyon ni kanhi presidente Rodrigo Duterte).
Dihang ni-resign si Daluz pagdagan pagka bise mayor ni Raymond, nipuli si Mike Pato, kanhi deputy ni Dino sa Office of the Presidential Assistant for the Visayas. Gitudlo sab dayon ni Raymond nga bag-ong board member nga si Atty. Ferdinand Pepito, nga gipailang law partner ni Daluz.
-o0o-
Ang grupo ni Dino gipasanginlan sab nga maoy utok sa mas dagko nga kadudahang mga transaksiyon sa City Hall. Lain nilang sakop nga si kanhi city administrator Jun Casas gikiha og plunder tungod sa garbage deal sa 2021 months nga nakapa-alkanse sa syudad og ?239 milyones.
Gilambigit sab sila sa gikuwestiyon nga binilyon ka pesos nga infrastructure projects ug mga transaksiyon atol sa pandemya sa COVID-19. Maong walay nahibulong nga gitawag sila sa usa ka kanhi konsehal nga mga ungo sa City Hall.
-o0o-
Laing atraso ni Dino nga dili angayng kalimtan sa mga Sugbuanon mao ang iyang pagbabag sa Bus Rapid Transit (BRT) project ug pag-ulog-ulog nga tukoran ang Sugbo og light rail transit ug monorail system.
Pulos pilde sa niaging eleksiyon sa Mayo 12 silang Gwen, Raymond, ug Daluz. Wala na sab sa puwesto si Dino. Pero pabiling nagtungkawo sa MCWD silang Pato, Pepito, ug kaubanan. Ug peligrong gamiton ni Dino ang iyang amo nga si
Senador Bong Go sa pag-impluwensiya sa bag-ong amiga ni Archival nga si Governor-elect Pam Baricuatro.
- Latest
