_freeman
^

Opinion

Kanus-a makabuylo ang pamakuna

ARANGKADA - Leo Lastimosa - The Freeman

Hinaot may makahunghong ni Lapulapu City Mayor Ahong Chan nga hunungon nang iyang pangangkon nga ang iyang hudlat sa “no vaccine, no entry” maoy nakapadasig sa katawhan sa pagpabakuna. Hagbay rang daghan ang ganahan nga magpabakuna, bisan niadtong wa pa siya kahunahuna og pangopya sa lagda, pero wa lang mabakunahi tungod sa kakuwang sa suplay.

Kon moinsistir gyod siya nga hudlat ray makapapugwat sa katawhan, ang kredito di niya maangkon. Mas unang nipasidaan nga di pagawason sa bay ang mga di magpabakuna si Presidente Rodrigo Duterte nga mas kahadlokan kay niya.

 * * *

Laing ebidensiya nga di hudlat ni Chan maoy nakapaspas sa pamakuna: Wa mag-una ang Lapulapu City sa gidaghanon sa fully vaccinated kon ibase sa target nga population sa Metro Cebu segun sa mga numero sa Department of Health (DOH) hangtod sa Agosto 3; ikalima ra.

Naapsan na sa Cebu City (16.65%) ang Mandaue City (16.59%). Ikatulo ang Naga City (10.32%) nga mas maayo og labok sa ikaupat nga Talisay City (10.13%). Nagtabla ang Lapulapu ug Minglanilla (9.37%) ug ikapito ang Consolacion (6.47%).

* * *

Base sa mga numero sa ibabaw, di ang kasabaan sa mayor ang motino sa kapaspas sa pamakuna. Kay di man sama kaalingugngog ni Chan silang Mayor Jonas Cortes sa Mandaue ug Mayor Kristine Chiong sa Naga. Maglisod ta og sukod pero mas nakatampo tingali sa kapaspas sa pamakuna ang kakugi ug kahapsay sa sistema sa mga mayor.

Ug ang gidaghanon sa mga bakuna nga ilang nadawat gikan sa DOH. Nga wa kapatin-aw sa misteryo giunsa pagbahin ang limitadong suplay.

 * * *

Pananglitan, lisod sabton ug angayng magyawyaw si Chan nganong mas daghan ang mga bakunang nadawat sa Mandaue kay sa Lapulapu nga mas dako mang populasyon sa Opon? May sukaranan si Acting Cebu City Mayor Mike Rama sa pagduda nga ang mga bakuna para sa mga syudad ug lungsod giilog sa Project Balik Buhay ni Presidential Assistant Mike Dino.

Mas seryusong sagpa sa pamakuna sa Sugbo ug Pilipinas ang paniid sa World Health Organization (WHO): Abunda nang suplay sa bakuna maong di madawat nga nagpabiling nagkamang ang pamakuna labi na sa mga lugar gawas sa Metro Manila.

AHONG CHAN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with