Unsaon pag-apil sa DITO promo
Naa na koy simcard sa DITO. Sa mosunod nga duha ngadto sa tulo ka adlaw. Kana kon tumanon sa DITO ang ilang saad gahapon sa paghatod sa akong simcard sa mosunod nga tulo ngadto sa upat ka adlaw. Nipasalig sila nga libre ang simcard ug libre sab ang delivery.
Gipabayad hinuon ko nila sa P199 sa promo nga unlimited data nga way speed cap sud sa tibuok buwan sa Marso. Pero sa mga tihik sama nako di gamay ang libre: P40 nga simcard ug delivery fee nga labing menos P50.
* * *
Labaw sa tanan wa ko mabiktima sa mga tindahan nga partner sa DITO nga nagpahimus sa paglumpong sa simcard sa ilang baligya nga mga telepono. Kay nakalusot ko sa online shop sa DITO bisan wa maapil ang akong telepono sa ilang listahan sa compatible nga handsets.
Segun sa mga suhito sa teknolohiya ang website sa DITO modawat lang sa mga naggamit og mga telepono nga naapil sa ilang lista. Isalikway nila ang ubang mga telepono nga wa sa lista bisan mas bag-o ug may suporta sa VoLTE (Voice over LTE).
* * *
Silay nitudlo nako sa pag-download og browser nga molipat sa sistema sa DITO. Gihatagan ko nila sa taas nga kutay sa mga letra ug mga numero nga gitawag nila og user-agent (UA) strings sa pipila sa mga telepono nga naapil sa lista.
Gi-copy and paste nako ang usa sa UA strings sa browser ug tuod man gideklarar ko sa website nga DITO-ready, gipabayad sa promo fee, gipa-download sa ilang app ug gisaaran nga hatdan sa simcard.
* * *
Kay nakaseguro man nga di ako ray ganahang mosuway sa gipasalig nga mas paspas nga internet connection sa DITO, nga segun sa National Telecommunications Commission (NTC) gikan sa kinahinayan nga 64 Mbps ngadto sa kinapaspasan nga 769 Mbps, nangahas ko bisan way angay sa pakigsawo sa ubang may mga telepono nga LTE, 4G ug 5G, pero giisnab sa lista, unsaon sa pag-apil sa promo.
Makakita ka sa akong gi-upload nga giya sa YouTube (https://youtu.be/azV7y5e0iNI) o tingali mas makasubay sa sinuwat nga mga detalye sa akong blog (http://bit.ly/38phTm3). Aron mas daghan na tang maghuwat.
- Latest
