Pagpanlimpiyo sa Oslob
P50 ang bayad sa matag turista nga maligo sa matahom nga sandbar sa Sumilon sa Oslob sa habagatang Sugbo. P25 ang bahin sa munisipyo, P12.50 sa Barangay Bangcogon ug P12.50 sa kahugpongan sa mga mangingisda.
Matod ni Mayor Jose Tumulak Jr. sa Oslob ang Barangay Bangcogon ug ang kahugpongan sa mga mangingisda mao'y gitahasan sa paglimpiyo sa sandbar. Kapakyas pagtuman sa ilang trabaho mao'y nakapugos ni Tumulak pagtak-op sa pito ka ektarya nga sandbar sugod karong adlawa hangtod sa Abril 16.
***
Wa magkuwang si Tumulak sa pagpahinumdom sa mga opisyal sa Bangcogon ug sa kahugpongan sa mga mangingisda sa ilang katungdanan sa pagpanlimpiyo. Apan maayo lang silang moyango sa atubangan.
Sa sinugdanan, mapailubon si Tumulak. Kay ang 100 ka mangingisda nga sakop sa kahugpongan gitahasan man nga magpulipuli mao nga nataligam-an lang tingali ang gimbuhaton. Apan dihang nagbuntaog ang basura human sa Semana Santa ug tungod sa pagpasera ni Presidente Rodrigo Duterte sa Boracay, nakahukom si Tumulak sa pagtak-op sa sandbar aron mapugwat ang mga hingtungdan sa di pagpaundayon sa ilang pagpabaya.
***
Nipasalig si Tumulak dihang nahinabi sa Arangkada sa dyAB Abante Pa, Bisaya! nga wa sab sila magpabaya sa pagtino sa kalimpiyo sa mainland sa Oslob. Matod niya gipatuman nila ang mga rekomendasyon sa Provincial Environment and Natural Resources Office (PENRO) pagtak-op sa mga baboyan ug ubang nakahugaw sa kabaybayonan.
Gihangop sab niya ang pagtuman sa Bluewater Sumilon Island Resort, kansang operasyon sa 17 ka ektarya nga isla magpadayon sama sa naandan, ug ubang hotels ug resorts sa mainland sa tanang mga lagda pagpanalipod sa kalikopan.
***
Dihang pipila na lang ka tuki (butanding) ang nipakita sa kadagatan sa Barangay Tan-awan, nga mao na karoy labing adunahan nga barangay sa Oslob, mga molupyo sa ubang mga barangay nituaw og mirisi. Kay sa nangaging katuigan naglaway ra man intawon sila sa dakong kita sa pagsulbong sa turismo sa pipila ka bahin sa Oslob.
Mao nga naaghat si Mayor Tumulak sa paggahin og kapin sa P10 milyones matag tuig alang sa mga proyekto sa tanang 21 ka barangay. Ang mga konseho sa barangay mao'y magbuot unsay labing haom ug dinalian nga mga proyekto nga dapatan sa ilang kuwarta.
- Latest
