Banga pa sa tadyaw
Leo Lastimosa (The Freeman) - February 5, 2016 - 9:00am

Haskang paita sa Land Transportation Franchising and Regulatory Board. Wa gyo’y klaro. Mora lang og nagduwa-duwa sa ilang trabaho. Usa ug tunga ka tuig na nga nagsige og tibugsok ang presyo sa lana, kapin na sa 70 percent ang napapas sa presyo sa krudo ug gasolina sukad niadtong Hunyo 2014, apan:

• P0.50 ray ilang gilaslas sa plitehan sa public utility jeepneys; ug

• P10 ray laslas sa plitehan sa taxis.

Di kana ra. Pulos pasiuna ang laslas sa plitehan nga ilang napatuman. Pasabot nga wa silay naluwatan nga bag-ong taripa sa mas ubos nga plitehan. Nga nisangpot sa wa unta kinahanglanang lalis sa mga pasahero ug mga drayber.

***

Ang maayong balita mao nga malaslasan og laing P0.50 ang minimum nga plitehan sa PUJs sa Sugbo, Bohol ug Siquijor sunod semana. Napada na sa ulohang buhatan sa LTFRB sa ilang rehiyonal nga buhatan sa Sugbo ang kamandoan sa laing provisional (pasiuna) nga us-os sa plitehan.

Si LTFRB-7 Regional Director Rey Elnar gimandoan sa pagpublikar dayon sa pamantalaan sa kamandoan paglaslas sa plitehan gikan sa P7 karon ngadto na sa P6.50. Gipasabot ni LTFRB Chairman Winston Gines ang dyAB Radyo Patrol nga mapatuman dayon ang mas ubos nga plitehan sa PUJs usa ka adlaw human sa publikasyon.

***

Apan ang di maayong balita mao nga, ug palihug panggunit sa imong lingkoranan, ang sukaranan sa labing uwahing us-os sa plitehan mao ang petisyon nga napasaka sa LTFRB dul-an sa duha ka tuig na ang nilabay. Di ko kabasol kun pipila na lay nahinumdom kinsay nipasaka sa petisyon: Si kanhi Cebu City councilor Jun Pe.

Ang petisyon ni Pe nga napasaka niadto pa’ng 2014 maoy gigamit nga rason sa ulohang buhatan sa LTFRB sa kalangay sa pagtakda sa P0.50 nga laslas sa plitehan sa PUJs dinhi sa ato sa niaging tuig. Maong naglaway una tang mga pasahero sa taga Metro Manila nga mas unang nakatilaw sa linaslasang plitehan sa Disyembre 2014.

***

Sa kataposan, napuslan na gyo’ng petisyon ni Pe human sa dul-an sa duha ka tuig. Apan mao na say nahimong rason sa kalangay pagtuki sa LTFRB sa mas bag-ong petisyon ni Kongresista Manny Iway sa niaging tuig nga nangayo og mas dako ug mas permanente nga laslas sa plitehan.

Ambot unsay bakukang nga nisud sa alimpatakan sa taga LTFRB nga nakababag nila sa paghiusa na lang unta sa mga petisyon alang sa mas paspas ug mas makiangayong hukom pagpagaan sa palas-unon sa mga pasahero. Motakda si Gines og laing husay sa petisyon ni Iway sa sunod semana. Kun ingon ini ka banga ang ahensiya nga gitahasan pagpalambo sa industriya sa transportasyon, kinsa pa may nagkinahanglan og kontra?

leo_lastimosa@abs-cbn.com

 

ANG APAN CEBU CITY CHAIRMAN WINSTON GINES JUN PE KONGRESISTA MANNY IWAY LAND TRANSPORTATION FRANCHISING AND REGULATORY BOARD LTFRB MAS NGA PLITEHAN
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with