2 bronze uli sa Team Philippines

MANILA, Philippines — Muling kumana ng dalawang tansong medalya ang mga national athletes para buhayin ang kampanya ng Team Philippines sa 20th Asian Games kahapon sa Aichi-Nagoya, Japan.

Nakuntento ang SIBOL Honor of Kings team sa bronze medal matapos ang 0-2 pagyukod sa China sa kanilang semifinals match.

Bronze din ang nakuha ng SIBOL squad sa Pok?on UNITE event noong Linggo.

May dagdag na tansong medalya ang sepak takraw men’s team regu nina Jason Huerte, Glindel Phori, Jom Lerry Rafael, Reynaldo Asilum Jr. at Ronsited Gabayeron mula sa 1-2 pagkatalo sa Malaysia sa sems.

Sigurado na sa silver ang women’s double team nina Nelly Jay Salon, Jean Marie Sucalit at Abegail Sinogbuhan nang talunin ang Laos, 15?12, 15?10, sa semis papasok sa finals.

Lalabanan ng tropa para sa gold ang Vietnam na sumibak sa South Korea sa semis, 15-6, 15-13.

Lumobo sa 10 bronzes ang nasikwat ng Pilipinas sa Aichi-Nagoya Asiad maliban sa dalawang golds ni gymnast Carlos Edriel Yulo at tig-isang silver ni mixed martial arts fighter Jean Claude Saclag at ng Gilas Pilipinas Women 3x3 team para upuan ang No. 16 spot sa medal tally.

Sa lawn tennis, itinumba ni World No. 18 Alex Eala si Patcharin Cheapchandej ng Thailand, 6-1, 6-0, sa women’s singles second round patungo sa quarterfinals kung saan niya lalabanan si Joanna Garland ng Chinese-Taipei.

Hahataw sa Round of 16 ng women’s doubles sina Tenny Madis at Stefi Aludo mula sa 6-3, 7-6 (4) paglusot kina Anjali Junarto at Meydiana Reinnamah ng Indonesia.

Sa boxing, tumiyak ng tanso si Carlo Paalam nang ilusot ang split decision win kay Jiamao Zhang ng China papasok sa semis ng men’s 55kg.

Minalas naman si Nesthy Petecio kay Chinese Yang Chengyu, 0-5, sa women’s 60kg quarterfinals.

Sa athletics, sasalang sa aksyon si pole vaulter EJ Obiena ngayong hapon, habang umabante sa finals ang national mixed 4x100m relay team nina Anfernee Lopena, Kristina Knott, Neil Catral at Jessica Laurance (41.92).

Tatakbo rin sa finals si Victoria Bossong (2:02.34) sa women’s 800m run.

Pumuwesto si Janry Ubas sa 11th place sa men’s long jump finals sa kanyang lundag na 7.39-meters.

Sa BMX racing, tumapos si 2022 Hangzhou Asiad bronze medalist Patrick Coo sa seventh place sa final round sa kanyang oras na 54.897 segundo.