‘Remember’ mosikad na karong  adlawa!

CEBU, Philippines — Sugdan na karong adlawa, Nobiyembre 11, ang pagpasalida sa pelikulang “Remember” nga gibitoonan sa magtiayong Dingdong Dantes ug Marian Rivera, nga nagdala og usa ka emosyonal nga istorya sa gugma, pamilya ug mga handumanan.

Sa wala pa ang opisyal nga pagpagawas sa pelikula, mibisita sa Sugbo ang duha ka bida ug nidalit og kalingawan sa ilang fans pinaagi sa espesyal nga mall show sa SM City Cebu sa niaging adlaw . Giubanan usab sila sa ilang kauban sa pelikula nga si Aiza Marquez.

Atol sa press conference nga gidumala sa JSP Ads and Promotions ni Josie Pereyra, gibutyag nila Dingdong ug Marian  nga lahi ang atake ug gipalapdan og samot ang  ilang pag-arte sa maong pelikula, ug  dili mawala ang bug-at nga emosyon nga gustong ipaabot sa mga tumatan-aw.

Suma pa  ni Marian, daghan ang natandog sa gipahigayon nga advance screening sa pelikula, diin adunay mga tumatan-aw nga mihilak tungod sa makapatandog nga mga eksena.

Sa “Remember,” gihulagway ang istorya sa magtiayon nga nahimulag ug daw nakalimot na sa kahulugan sa gugma. Apan napugos silang magpakaaron-ingnon nga nagkahiusa pag-usab alang sa ilang anak .

Samtang ilang gibalikan  ang nangaging mga kasinatian, ilang madiskobrehan nga ang tinuod nga gugma adunay taas nga panumduman ug usahay, milagro lamang ang gikinahanglan aron mabalik ang mga pagbati nga daw nawala na.

Nakatrabaho nila og balik ang direktor nga si Mae Cruz Alviar.

Kauban usab sa cast sila Zia Grace, Joross Gamboa, Kyle Echarri, Ana Abad Santos, Carla Humphries, Jobert Austria, Jeff Lamay ug Dominic Lorange. -

Ang  “Remember”  kay gipaluyohan sa Star Cinema, kauban ang APT Entertainment, Agostodos Pictures ug Regal Entertainment, Inc.