Attitude problem issue, gihimakak ni Michael

CEBU, Philippines — Giklaro sa aktor nga si Michael Sager nga ang conflict sa iyang iskedyul maoy hinungdan sa pagputol  sa iyang karakter isip Nate sa afternoon drama sa GMA Network nga Born to Shine.

Gihimakak niya ang alegasyon nga gitangtang siya sa serye tungod sa iyang attitude problem.

Suma pa  ni Michael, naningkamot pa unta siya nga magpadayon sa maong serye apan natakdo ang taping schedule niini sa iyang laing proyekto nga The Way Back to You.

Sa dihang gi-extend ang Born to Shine, nagsugod na usab siya sa iyang bag-ong responsibilidad isip bag-ong -ong host sa Pinoy Big Brother (PBB) Collab 3.0. 

DoReMi himoan og musical play

Miulbo karon ang taho nga himoan og musical play  ang iconic nga pelikulang Do Re Mi nga gibidahan nila Regine Velasquez, Donna Cruz ug Mikee Cojuangco. Gisugdan na ang preparasyon alang sa maong proyekto, lakip na ang pagpahigayon og auditions alang sa mga posibleng mahimong kabahin sa produksyon. Target nga ipasundayag sunod tuig  ang theater version sa maong pelikula .

Nagbunga ang sakripisyo

Human sa duha ka tuig nga todo pagpangandam , gibati karon ni Sophia Bianca Santos ang  tumang kalipay  human nalangkat  ang titulo nga Miss Elite World 2026  didto sa Egypt. Malipayon ang beauty queen gumikan kay niresulta gyud iyang mga sakripisyo.Suma pa niya, importante ang pagsalig sa kaugalingon, pagpadayon sa paningkamot ug pag-andam dili lamang sa pisikal  kondili apil usab sa mental ug emosyonal nga aspeto.

Pangandoy ni Ronnie

Human na-expose sa nagkadaiyang sektor sa komunidad, nakaingon si Ronnie Liang nga ganahan siya mahimong presidente  sa nasud .  Suma pa sa singer nga libre mangandoy busa nipahiyom siya sa pagpadayag sa iyang tingoha .