Ex-gf sa amigo

Dear Tito Miguel ,

Maayong adlaw sa imong suking readers . Tawga lang ko og Erik nga taga Consolacion , Cebu . Medyo maulaw ko sa istorya nga akong gipadala nimo, apan dili gyud ko kaagwanta kun ako kining ihilom.

Duna koy ganahan nga girl , siya si Isabel , nga taga  San Fernando, Cebu . Ang problema lang karon, medyo maulaw ko modiskarte ni Isabel tungod kay ex-girlfriend man gud siya sa usa sa mga soud nako nga higala . Nagkaguliyang ang  akong hunahuna kay kabalo ko nga kiwaw kaayo paminawon ilabi na kun maabot ang panahon nga makahibalo akong amigo nga ganahan ko sa iyang ex-girlfriend.

Basin makaingon akong amigo nga nisalo ko sa iyang sinuka.  Usahay, akong pugngan akong kaugalingon ug likayan siya, pero lisod kay pirmi nako siya mahunahunaan.  Dili ra ba lain paminawon kun diskartehan nako ang ex-girlfriend sa akong amigo? — Erik

* * *

Erik,

Tinuod, bakikaw ang manguyab sa ex sa higala. Dili pa tungod kay basin makaingon siya nikaon ka sa iyang sinuka. Sigurado ka nga iyang gisuka, dili ba kaha ang babaye ang nisuka niya? Ang tinuod nga rason kay basin magduda siya nga naibog ka sa iyang uyab samtang sila pa. Diha mogimok iyang imahinasyon nga samtang sila pa, duna kay pagnanasa.

Apan kining tanan wala nay kuwenta kun ang imong higala hingpit na nga naka-move-on. Kay mao ra nay makatugot nimo nga manguyab sa iyang ex. Kun ganahan gyud ka sa iyang ex ug sayangan ka kun wa lang kay buhaton tungod sa kaikog, kani ang buhata.Higala man gyud mo, istoryaha siya. Ingna nga kalit man ka na interesado sa iyang ex. Wa lang nimo damha, kay sa una sa uyab pa sila amiga ra man gyud imong tan-aw niya.

Kun mora’g malain, ingna dili ka mopadayon aron lamang dili maapektohan inyong panaghigala. Kun mohilom lang, ingna basin nakalitan siya, paaboton nimo ang iyang tubag kun andam na siya. Kun moingon bahala ka, wa na siya’y labot sa iyang ex, wala na kay problema. Gawas kun gihagit lang ka. Apan kun duna na siya’y laing uyab karon, dako ang purohan nga balewala na kaniya.

Apan pag-andam sa posibilidad nga maapektohan gihapon inyong pagka-amigo. Timbang-timbanga, angayan ba isugal nimo inyong pagkahigala tungod lamang sa babaye? Worth it ba nga mauyab nimo ang babaye apan imong higala kanimo modistansiya na? Tito Miguel

Magpatambag ka? Ipada kang Tito Miguel: 0991-318-9366