Kaye, cancer-free na!

CEBU, Philippines — Nipadangat og emosyonal   nga mensahe ang aktres  nga si Kaye Abad sa pagsaulog niya sa iyang adlawng natawhan sa niaging adlaw human niya mabuntog ang pakigbatok sa breast cancer. Sa iyang latest vlog, gipaambit ni Kaye ang iyang lisod nga kasinatian sa usa ka tuig nga pagsagobang sa maong sakit . Nagsugod ang tanan niadtong 2024 human siya nakasinati  og grabeng sakit sa tiyan nga iyang gihunahuna nga simpleng hyperacidity lamang.

Apan human sa ultrasound, nadiskubre nga adunay siyay daghang gallstones ug gioperahan kini. Human sa operasyon, gitambagan siya sa iyang doktor nga magpa-mammogram tungod sa iyang pangedaron.

Didto nadiskubre sa mga doktor nga adunay siyay breast cancer nga adunay 95 porsyento nga malignancy reading.

Gibutyag ni Kaye nga wala siya kahibalo unsay mahitabo sa iyang pagtambal ug kung makalahutay ba siya sa maong pagsulay. Miagi siya sa daghang kahadlok, kasakit ug kawalay kasiguruhan apan nakakaplag usab og kusog pinaagi sa pagtuo, paglaom ug gugma sa iyang pamilya. Nakahilak  usab ang aktres sa dihang iyang gisultihan ang iyang bana nga si Paul Jake Castillo ug ilang pamilya bahin sa iyang kondisyon.

Nakahukom  ang magtiayon nga didto sa Singapore ipahigayon ang tanang tests ug procedures alang sa pagtambal ni Kaye. Usa sa labing lisod alang kaniya mao ang pagbiya sa ilang duha ka anak samtang molarga siya paingon abroad nga wala siya kahibalo kanus-a makabalik. Sa vlog, gipakita usab ang iyang mga pagpatambal, konsultasyon ug mga pagsulay sa Singapore diin wala gayud siya biyai sa suporta sa iyang bana, pamilya ug mga higala lakip si Paolo Contis.

Human sa usa ka tuig nga pakigbisog, mipadangat  usab ang maayong balita nga dugay niyang gihulat. Gipahibalo sa iyang doktor nga cancer-free na siya ug usa na ka survivor. 

ABS-CBN, milusad sa “Together Forever” campaign

Nagpagawas ang ABS-CBN og bag-ong makapatandog nga video nga nagpakita sa kahimtang sa mga overseas Filipino worker (OFW) ug kung giunsa pagpakunhod sa ilang homesickness pinaagi sa pagtan-aw sa mga Kapamilya shows sa Kapamilya Online Live sa YouTube ug sa iWant kauban sa ilang pamilya nga anaa sa Pilipinas. Kabahin kini sa “Together Forever” campaign isip ilang pasalamat sa walay hunong nga suporta sa mga Kapamilya ngadto sa mga programa ug artista sa ABS-CBN.

Makita ang Kapamilya Online Live sa ABS-CBN Entertainment YouTube, ang entertainment channel sa Southeast Asia nga adunay kapin 54.8 milyon ka subscribers.

Lakip sa mga programa nga makita  dinhi mao ang “Blood vs Duty,” “The Alibi,” It’s Showtime, ug TV Patrol. Apil usab ang mga  weekend game shows nga Kapamilya Deal or No Deal ni Luis Manzano ug Everybody, Sing!  ni Vice Ganda. Mosikad usab karong tuiga sa Kapamilya Online Live ang  primetime action series nga “Sigabo” nga pagabidahan nila Coco Martin ug Julia Montes.

Anne nakahimamat kang Zhang Linghe

Nagmaya si Anne Curtis gumikan kay nakapahulagway gyud siya kauban  ang Chinese actor nga si  Zhang Linghe, bida sa  hit C-drama nga The Pursuit of Jade.

Nahitabo kini atol sa Gucci Core show didto sa Times Square sa  New York sa niaging adlaw .

 Nasayran nga ubay-ubay ka mga personalidad sa natad sa fashion ang nitambong sa maong kalihokan.

Mariel nanalilpod sa iyang bana

Dako ang pagtoo sa TV host-actress nga si Mariel Rodriguez nga daghan pa gyud ang mabuhat sa iyang bana nga si  Senador Robin Padilla isip public servant. Gisaysay kini ni Mariel atol sa guesting niya sa podcast ni Senator Imee Marcos.

Nasayran nga gi-bash og maayo si Robin  kinsa gikuwestyon ang kapasidad sa pagpangalagad sa katawhan.

Suma pa niya nga magpadayon gihapon ang pagsalmot  ni Robin sa umaabot nga piniliay karong 2028. 

JM nanguyab kang Fyang

Gikumpirmar ni JM Ibarra nga nanguyab siya sa iyang ka-loveteam nga si  Fyang Smith. Gibutyag kini sa aktor atol sa guesting nila ni Fyang  sa  latest episode sa "Oh My Gan". Gitataw hinoun ni JM nga wala siya magdali sa tubag ni Fyang ilabi na karon nga na-busy sila sa ilang mga career."Hindi kami nagmamadali parehas. I can say na until now, nandun pa rin sa panliligaw. Pero hindi ko naman minamadali," suma pa ni JM.

KAIA nataypan

Mikulit og dakong atensyon ang Filipino girl group nga KAIA human sa ilang pasundayag sa  hugyaw nga rendisyon sa Take Down nga giawit sa HUNTRIX inubanan sa ilang single nga "You Did It" atol sa “Backyard Live Spotlight. Mga pagdayeg ang kasagaran nga komento nga nadawat sa maong grupo.Ang KAIA kay gilangkoban nila Angela, Charice, Sophia, Alexa, ug Charlotte.

Aprobado sa bana

Wala ra gyu'y problema si Erwan Heussaff    sa iyang asawa nga si Anne Curtis kinsa dunay nagkalain-laing kapares sa mga proyekto niiini. Suma pa ni Erwan nga artista na daan si Anne sa dihang nagkaila sila niini busa nakasabot ra gyud siya .