Hadlok mailog ang uyab

Dear Tito Miguel,

Maayong adlaw, ako diay si Dominic, 23 anyos, taga Barangay Guadalupe, Cebu City. Naa ko'y uyab, siya si Regina nga akong gihigugma pag-ayo. Buotan siya ug tarong ug grabe gyud ka masinabtanon.

Usa siya ka club dancer, ug nagkaila mi kaniadto didto sa iyang trabahoan. Nasabtan nako nga trabaho ra na niya ug para pud sa iyang panginabuhian, apan dili gyud malikayan nga magselos ug mag-overthink ko.

Kadaghan na nako siya giingnan kung pwede ba siya mo-resign ug mangita og lain nga trabaho.

Wala nako gipakaminos ang iyang trabaho ha, mahadlok lang gyud ko nga mailog siya sa lain.

Dili siya mohunong kay mao ra gyud na iyang source of income karon ug kapoyan na siya mo-adjust kun pananglitan mosulod siya og bag-ong trabaho. Nipasalig siya nga wala siya’y ginabuhat nga dautan ug limpyo ra iyang konsensya. Nituo man ko niya, pero naa gihapon koy kahadlok nga mailog siya.

Unsaon nako pagdawat ug pagsabot sa iyang sitwasyon? — Dominic

* * *

Dominic,

Dili ka mabasol sa imong kahadlok. Ang mga customer nga mosulod sa club nangita na’g lingaw. Ang uban tagbaw na nga motan-aw lang, duna’y mo-table ug dunay mo take home nila.

Pero dili ta kahukom kun maayo o dautan iyang trabaho. Daghan bitaw mga politiko tawagon ma’g honorable, naka-barong o Filipiniana pa, apan sige’g pangawat sa kuwarta sa katawhan. Pero imong uyab, kun igo ra siya mosayaw, wala siya’y gitapakan nga laing tawo, igo ra siya nanginabuhi bahala’g tan-aw sa uban iyang trabaho hiwi.

Nipasalig siya nga wala siya’y gibuhat nga dautan. Kun tinuod, maayo. Apan kun duna siya’y gitago, delikado. Timan-i, dili siya kabiya sa iyang trabaho kay nanginahanglan siya’g kuwarta. Duna’y purohan nga masilaw siya sa kuwarta labi na’g gipit na siya. Kapit sa patalim, matud pa.

Aron ka mahimutang, pangutan-a imong kaugalingon. Unsa ma’y imong plano niya, pakaslan ba nimo siya sa umaabot? Ka’y kun seryoso ka niya, paninguha nga mo-asenso ka aron dili na siya kinahanglan mosayaw pa atubangan sa mga customer nga naglaway niya.

Pero’g wala ka’y plano, dawata iyang trabaho ug tuo sa pasalig niya nga taman ra siya sa sayaw. Lagmit breadwinner siya, unya’g paundangon nimo, mag-unsa man iyang pamilya. Apan nahadlok ka, basin siya mailog sa lain. Posible, duol raba siya sa temptasyon. Apan timan-i, ang babaye nga nahigugma, kanimo mopilit sa hingpit. Kun mailog man siya, dili na tungod sa iyang trabaho o kun asa siya. Tungod na mismo sa iyang pagkatawo, kun ligdong ba siya’g tarong. — Tito Miguel

Magpatambag ka? Ipada kang Tito Miguel: 0991-318-9366