Matinabangon

Dear Tito Miguel,

Maayong adlaw, ako diay si Ashia, 25 anyos, taga Borbon, Cebu. Ang akong uyab nga si Joshua Philip kay buotan kaayo ilabi na sa iyang mga higala. Kada adunay problema ang iyang mga friends, buwag, problema sa pamilya, o bisan gamay nga kalisod, siya gyud ang unang motabang ug maminaw.

Apan nakabantay ko nga kung siya na ang nanginahanglan og tabang o kaistorya, halos wala siyay madangpan sa iyang mga higala. Usahay, kung siya ang down o naay problema, dili gyud manubag o magpakita og suporta ang iyang mga higala nga parehas sa iyang gibuhat para nila. Masakitan ko para niya kay unfair gyud kaayo ang maong sitwasyon. Nakasulay na ko og sulti niya ani, pero iyang tubag kay okay ra daw niya ug wala siyay gipaabot nga kapalit. Para niya, importante nga makatabang siya.

Pero para nako, dili man gud unta one-sided pirmi.

Karon, naglibog ko unsaon nako siya pagtabang. Dili nako gusto nga kontrolon ang iyang pakig-amigo, pero gusto pud nako nga ma-realize niya ang iyang value ug dili magpabilin sa sitwasyon nga siya ray permi naghatag.

Daghang salamat, ug hinaot matambagan ko nimo. — Ashia

* * *

Ashia,

Ang tinuod, suwerte ka kay imong uyab matinabangon ug wala nagpaabot ug kapalit. Mao na’y tiunay nga tabang. Pero basin duna ni siya’y messiahnic complex, nagtuo siya nga siya makasalbar sa mga nanginahanglan. Apan husto sab ka nga ang kabuotan kun masobrahan, mora na’g katangahan, ka’y igo ra siya pahimuslan. Gani, maka-ingon sab ta dili diay ni sila nga tiunay nga higala, ka’y ngano’ng bale wala man siya kun mao na’y manginahangla’g tabang.

Hinuon, wala nimo giklaro unsa nga klase nga tabang iyang ginahatag sa iyang mga higala. Kun emotional lang nga suporta, pinaagi sa iyang tambag o presensiya, ok ra na, dili siya alkanse.

Pero kun motunol na siya’g kuwarta aron makatabang, kinahanglan iya limitahan. Kani ang buhata, ingna bilib ka sa iyang pagkamatinabangon, gani gipasigarbo pa nimo siya. Apan angay sab niya hunahunaon iyang kaugalingon. Kinahanglan dili ang tibuok kantitad nga gikinahanglan ang iyang itunol. Kun pananglit nanginahangla’g diyes mil, taman ra sa iyang katakus ang ihatag. Mahimo ra ang usa ka libo o kinyentos isip tabang, ka’y sigurado dili ra siya ang higala nga maduolan sa nanginahanglan, naa pa gani unta pamilya. Ang Pilipino raba kay dili mobayad sa utang, para nila gihatag na, busa wala kay katungod maningil.

Sa maong paagi, wala siya hingpit nga nibalibad sa nanginahanglan, nakatabang gihapon siya, iya lang gilimitahan. Maski dili na siya bayran, tutal gamay ra man nga kantidad, dili niya ika-pobre, dili sab madatu ang iyang gitabangan. — Tito Miguel

Magpatambag ka? Ipada kang Tito Miguel: 0991-318-9366