Gilaay sa relasyon

Dear Tito Miguel,

Ako diay si  Mat , 25 anyos , taga Argao , Cebu .Naa ko’y uyab nga akong gihigugma pag-ayo ug siya si Maria Cheng , 25 anyos.

Susama ming duha,   nurse ang among propesyon.   Nagtrabaho ko sa usa pribadong hospital , samtang siya kay pampublikong hospital . Tungod sa among ka-busy sa trabaho , usahay na lang gyud mi magkita .  Nakabantay ko nga , ako na lang  permi mag-initiate nga magkita mi. Kun dili ko makigkita , okay ra pud niya . Tungod niana ,   gilaay nako sa among relasyon .  Sa tan-aw nimo Tito Miguel , angayan pa ba nga ipadayon ang among relasyon ? O naa ba ka’y tips diha , aron dili ko ka-feel og laay sa among relasyon? Salamat kaayo sa paghatag og pagtagad sa akong suliran . — Mat

Mat,

Kun ikaw ra sige’g panghagad magkita mo, dili na siya interesado. Sa laktod, puwede ra nga wala ka. Ka’y kun gimingaw pa siya nimo, mangita gyud na’g paagi maski unsa ka busy. Hinuon, wala ka maghisgot sa text o tawag. Kun hasta pag -chat dili na niya buhaton, kanimo wala na siya’y amor. Tingali sa inyo ka busy naanad mo nga dili na magkita, hangtud nahinayak siya.

Buot pasabot dili pa hingpit iyang gusto ug gugma kanimo. Ka’y kun gihigugma pa gyud ka niya, pangitaon gyud ka, paninglan man gani ngano wala na mo’y komunikasyon. Masuko pa kun molabay ang adlaw dili ka magparamdam.

Nihupas na iyang gugma, kun duna man sa sugod pa lang. Kun hasta ikaw gilaay na, buot pasabot pareha mo’g gibati . Puwede ra nga di na mo magkita, hangtod magkabuwag. Gani, posible para niya buwag na mo, wa lang ka kahibawo. Basin dugay na nagpaabot nga ikaw ang makasabot. Busa dili na ka angay mangayo’g tips unsao’g balik ang kainit sa inyong relasyon. Wala na, nihupas na’g nibugnaw ug nahanaw. Kun gusto ka makasiguro, suwayi’g dili sad ka magplano magkita mo, kalit lang ka mawala’g mapawong. Kun dili ka pangitaon, buot pasabot wala na mo’y kaugmaon. Kun pangitaon ka, basin igo ra nahibulong, maniguro kun okay ra ka. Tabla ra nga wala ka pangitaa. Kun mangutana’g ngano, sulti sa imong gibati, klaroha’g naa pa ba’y kamo.

Tito Miguel Magpatambag ka? Ipada kang Tito Miguel: 0991-318-9366