The EDDYS, hindi muna tuloy

MANILA, Philippines — Ililipat sa ibang petsa ang gaganaping 6th The EDDYS o Entertainment Editors Choice ng Society of Philippine Entertainment Editors (SPEEd).

Nauna itong itinakda sa darating na Oktubre 22, pero hindi muna matutuloy.

Nagdesisyon ang mga opisyal at miyembro ng SPEEd na i-postpone ang ang ikaanim na edisyon ng The EDDYS na gaganapin sana sa EVM Convention Center sa Quezon City.

Ayon sa presidente ng samahan ng mga entertainment editors sa bansa na si Eugene Asis, kinailangang kanselahin pansamantala ang awards night ng The EDDYS dahil sa ilang hindi inaasahang pangyayari na hindi kontrolado ng organizer at producer.

Dahil dito, minabuting ilipat ng petsa at venue ang Gabi ng Parangal.

Agad na maglalabas ng mga kaukulang detalye ang pamunuan ng SPEEd at ang Airtime Marketing Philippines na pag-aari ni Tessie Celestino-Howard, ang producer ng 6th The EDDYS oras na maisaayos ang lahat.