Makabilib

CEBU, Philippines — Nibilib si direk Dante Parungao sa iyang mga artista sa “High-Rise Lovers” sa drama anthology nga I Can See You sa GMA7. Una, nigahin gyud matud pa sila si Lovi Poe, WynWyn Marquez og three sessions aron tun-an nila ang ilang mga character, hinungdan nga pag-abot nila sa shooting, diretso-diretso na ilang tabaho sanglit nakasabot na sila unsay angayan nilang buhaton. Ug ikaduha, maayo matud pa ang acting nga gipakita sa mga bida—tigi gyud matud pa si Lovi ug WynWyn.

Star-studded cast

Sila si Carlo Aquino, JC De Vera, ug Kit Thompson ang leading men ni Erich Gonzales sa ABS-CBN teleserye nga “La Vida Lena” nga ubos sa direksyon ni  Jerry Lopez Sineneng  ug Jojo Saguin.  Malakip sab niini ang mga veterans nga sila Agot Isidro, Raymond Bagatsing ug Janice De Belen. Pasok pud sila si  Pen Medina, Ruby Ruiz, Soliman Cruz, Christian Vasquez, Malou Crisologo, Josh Ivan Morales, Hasna Cabral ug Sofia Andres. Ang La Vida Lena moy comeback teleserye ni Erich human sa Blood Sisters niadtong 2018.

Pagbuot sa Ginoo

“Pinag-isa tayo ng Diyos at pag-ibig!” Kana maoy caption ni Bianca Manalo sa iyang pagpadayag og kalipay nga mahibalik na sa free TV ang ABS-CBN pinaagi na sa “A2Z” Channel sugod ugma puhon. Lakip sa isalida sa A2Z Channel ang FPJ’S Ang Probinsyano, diin usa si Bianca sa mga bida.

Better Rated K

Mas nindot pa unya nga Rated K ang makita sa TV5 sugod karong buwana. Kini maoy pamahayag ni Korina Sachez atol sa iyang pagpirma og kontrata sa Brightlight Productions nga maoy mopasalida sa Rated K sa TV5. Matud ni Korina mas aktibo na siya karon ug wala nay politika sa iyang kinabuhi busa mas maka focus siya.

Engaged

Engaged na si Bettina Carlos ngadto sa iyang hinigugma nga si Mikki Eduardo niadtong Miyerkoles sa gabii. Simple apan romantic ang engagement proposal ni Mikki. Si Bettina nga tulo ka tuig na nga dili aktibo sa showbiz kay nag-focus sa iyang pastry business, nisaysay kaniadto nga answered prayer niya si Mikki, sanglit giampo niya nga hatagan siya og lalaki nga higugmaon siya u gang iyang anak nga si Gummy.

Fake news

Dakong buhi si Anna Marie Gutierrez kinsa gibalita kaniadto nga namatay na niadtong 2009 didto  sa US. Si Anna Marie ang bida sa Scorpio Nights1 nga nagpasikat kaniya og maayo, apan nitalikod siya sa showbiz niadtong 1987, human sa pito ka tuig ug paghimo niya og 40 ka mga pelikula. Matud ni Anna Marie ngadto sa PEP, malipayon ug malinawon na siya karong nanimuyo sa New York kauban sa iyang bana ug 13-year nga anak babaye, ug nagtrabaho siya isip hospital administrator.

Cancer-free

Baynte ka tuig na nga cancer free ang 51-year old actress nga si Maritoni Fernandez ug puno siya sa pagpasalamat ngadto sa Ginoo ug sa iyang pamilya.  Ug may pahinumdom  sab siya sa iyang social media followers: “October is breast cancer awareness month so go get yourself checked. I know it’s Covid and all but don’t delay your check-ups. Set an appointment and go get it done. You can safely go as long as you prepare properly. Nothing matters more than your own peace of mind. Remember always that early detection is key to surviving Breast Cancer. “

Love and Respect

Dili mausab ang paghigugma ug pagrespeto ni Daniel Padilla kang Mr. M o Johnny Manahan bisan pa man og ni-resign na kini sa Star Magic ug gitakda na nga mulugwa ang mugna nga mga shows sa TV5. Suma pa ni DJ, amahan na ang iyang pagtan-aw kang Mr. M, nga kun unsa man siya karon sa showbiz, kining tanan gumikan sa paggiya ni Mr. M kaniya.

Song cover

Nagpatabang si Sandara Park sa iyang mga fans sa Pilipinas kun unsay nindot nga himoan niya og song cover para sa iyang channel. Lakip sa mga gisugyot mao ang KLWKN, Mabagal ug 2020 version sa iyang sikat nga kanta kaniadto nga “IN or Out”. Si Sandara produkto sa Star Circle Quest sa ABS-CBN, nihimo og pipila ka pelikula, dayon nipauli sa South Korea diin nisikat siya og maayo isip sakop sa girl group nga 2NE1.

Daghang pahugyaw!

“Maraming pasabog talaga." Mao ni tsika sa usa ka production insider ngadto sa PUSH kabahin sa hingpit na nga pagbalik sa It’s Showtime pinaagi sa “A2Z” Channel ugma puhon sa udto.

Ang tsika mao grand opening number ang mga sikat nga kanta nga "Dynamite" ug  "Unstoppable" diin performers sila si Vice Ganda, Vhong Navarro, Jhong Hilario, ug Kim Chiu.

Mokanta si Karylle og “Goodtime" samtang ang Jugs and Teddy awiton ang “Electric Dreams" together.

Mosayaw sab matud pa sila si  Amy Perez, Ryan Bang, Ion Perez, ug Jackque Gonzaga.

Ang tibuok It's Showtime cast mokanta sab sa awit nga "Ang Buhay ay Gulong, Umiikot Lang.”

Ugma sab ang weekly finals sa "Tawag ng Tanghalan."