Daghang Offers

CEBU, Philippines — Gumkan sa kasikat sa BL series nga Gameboys, napuno na matud pa og TV ug movie offers ang mga bida niini nga sila si Kokoy de Santos ug Elijah Canlas. Apan suma pa sa producer nga si Perci Intalan, dili nila madawat ang maong offers gumikan sa sitwasyon karon ug kay ma busy pa sila sa season 2 sa maong BL series nga minilyon ang views sa Youtube.

Angel & Neil

Gitakdang ilusad na sa kaslonon nga sila si Angel Locsin ug Neil Arce ang ilang kaugalingong Youtube channel. Mao kini gipahibawo ni Angel niadtong Domingo ngadto sa iyang 8.1 million Instagram followers ug 12.4 million Twitter followers.

Scholarship Foundation

Gibutyag ni Alex Gonzaga nga aduna siyay gisuportahan nga foundation nga naghatag og scholarship ngadto sa mga kabos nga mga bata aron makalampos sila sa kolehiyo. Kini dihang usa ka netizen ang nisugyot nga unta mopaambit si Alex sa iyang mga grasya isip usa sa labing malampuson nga vlogger sa Pilipinas. Matud ni Alex, dili siya mamahimong mag-post kabahin niini kay dili sila buot nga makita ang nawong sa mga bata.

1M subscribers

Naka 1 million subscribers na si Maja Salvador sa Youtube. Kini maoy iyang gipaambit ngadto sa iyang 8.1 million followers sa Instagram. Hinumdumon pa ni Maja nga dihang gimugna niya ang iyang channel tumong niya nga mas mailhan pa siya sa iyang fans. May 2019 niya gimugna ang iyang YT channel.

No to Sexual Harassment

Nipalag na ang kanhi child actress nga si Xyriel Manabat batok sa mga binastos nga iyang nadawat gikan sa netizens human ni-trending ang iyang mga hulagway diin makita nga dalaga na gyud ang kanhi bida sa 100 Days To Heaven. Nanghinaot si Xyriel nga makaamgo ang publiko nga dili gyud okay ang sexual harassment bisan kanus-a.

Under investigation

Gawas sa usa ka tabloid ug reporter nga gikiha na ni kanhi Miss Universe Catriona Gray, aduna pay upat ka social media accounts nga giimbestigahan karon sa NBI kay nagpunay matud pa og pangdaot sa nahisgutan online.

Surviving

Labihang hinugtanay sa bakos ang gibuhat nila ni Carla Abellana ug mga kasosyo sa negosyo aron lang gyud mulahutay ang ilang steak house taliwala sa health crisis. Nanangtang sila og empleyado, gikunhuran ang sweldo sa managing partners ug nibalhin sila og gamay nga pwesto.

Gilaay

Napul-an na ang anak nila ni Marian Rivera ug Dingdong Dantes nga si Zia sa kasamtangang sitwasyon. Suma pa buot na sa 4 anyos nga tsikiting nga magduwa sa gawas busa nakapangutana kini kanus-a mawagtang ang virus. Gimingaw na matud pa ang bata sa iyang mga classmates ug buot niini nga mo eskuyla na matag adlaw. Hinuon nakasabot ra sab matud pa si Zia sa sitwasyon ug nga kinahanglan pa gyud nga magmatngon.

Watch Collection

Giladlad ni Megastar Sharon Cuneta niining bag-o lang ang iyang watch collection pinaagi sa usa ka vlog. Apan giklaro niini nga dili paghinambog ang iyang tumong, kundili pagpakita lang unsay matuod. Mga vintage na kasagaran ang mga relo ni Sharon, ang uban nagkantidad na karon og tunga sa milyon ka pesos.

Survivor

Mas palig-onon na matud pa ni Enzo Pineda ang iyang pagtuo, human siya na ayo sa Covid 19, ingon man usab ang iyang amahan nga si partylist representative Enrico Pineda. Dako ang pasalamat ni Enzo ngadto sa mga medial frontliners nga maoy nitabang nila aron mamaayo. Matud nii Enzo, bayani ang frontliners.