Marian matinabangon

CEBU, Philippines - Dako ang pasalamat ni Ate Gay ngadto ni Kapuso Primetime Queen Marian Rivera gumikan kay gitabangan gyud ang iyang higala nga si Boobay nga kasamtangang nagpa-ayo karon sa tambalanan. Matud pa niya nga wala siya masayop sa pag-ila sa aktres tungod kay aduna kini maayo nga kasingkasing nga motabang ngadto sa mga nanginahanglan.

Lolita mipanaw na

Mitaliwan na kagahapon ang beteranang aktres nga si Lolita Rodriguez sa edad nga 81. Giingon nga na-stroke ang aktres didto sa iyang panimalay sa California. Si Lolita usa sa mga inila nga banggiitang aktres kaniadto.  Pipila sa iyang sikat nga mga pelikula naglangkob sa Tinimbang Ka Ngunit Kulang, Tubog sa Ginto, Ina Ka ng Anak Mo ug uban pa.

Trabaho ang prayoridad

Tsika pa ni Congresswoman Vilma Santos nga usa unta siya sa malakip sa katapusang pelikula nga pagahimoon ni Mike de Leon sunod tuig. Matud pa niya nga wala dayon siya makahatag og tubag niini gumikan kay unahon niya  og atiman ang iyang trabaho sa kongreso.

Damgo ni Natalie

Gipangandoy sa  sexy star nga  Natalie Hart nga makauban sila si Coco Martin ug Albert Martinez sa usa ka proyekto gumikan kay bilib kaayo siya sa maong mga aktor. Gusto usab niya nga makasuway nga malakip sa usa ka teleserye human siya nahimong bida sa indie film nga Siphayo ug ang entry nga Tisay sa Cinema One Festival. Dugang pa niya nga adunay mga network   nga nitanyag kaniya og proyekto apan padayon pa niya kini nga gitun-an.

Burger ni Kris

Gipasigarbo sa Kapuso star nga si Kris Bernal ang iyang ginegosyo nga burger   gumikan kay matud pa dili kini makatambok. Matud pa niya nga siya usab ang nangunay og himo  sa mga patty sa burger aron dili kini parat ug dili na usab manginahanglan og ketchup ang iyang costumers.

 Dili komportable

Tsika pa ni Jessy Mendiola nga dili niya tan-awon ang kissing scene nila ni Enchong Dee sa pelikula nga Mano Po 7. Giangkon niya nga dili siya komportable sa paghimo sa maong eksena bisan pa og dugay na niya nga nakatrabaho ang aktor.

Maka-relate sa papel

Gipadayag ni Sunshine Dizon nga maka-relate siya sa iyang karakter isip Adhara sa bag-ong serye sa GMA-7 nga Ika 6 Na Utos nga magsugod na karong Lunes. Suma pa niya nga angayan gyud atngan ang iyang paglugwa sa maong  serye gumikan kay mapakita gyud niya ang nahitabo sa iyang kinabuhi.

Dili manghilabot

Gi-deny ni Xian Lim ang taho nga iyang gidid-an si Kim Chiu nga makapares pagbalik sa ex-boyfriend niini nga si Gerald Anderson. Suma pa ni Xian nga dili siya manginlabot sa ilang tagsa-tagsa ka desisyon mahitungod sa trabaho. Dugang pa niya nga proud siya alang kang Kim gumikan kay gidawat gyud niini ang proyekto .

Nayayay

Emosyonal karon ang komedyante nga si Pokwang gumikan sa kahimtang sa iyang inahan nga si Gloria kun diin nagkagrabe na ang sakit niini nga Alzheimer’s Disease.  Suma pa ni Pokwang nga dili gyud niya mapakita sa iyang inahan nga nasakitan siya sa kondisyon niini aron dili kini mabalaka.

Jadine natagam

Gibutyag ni Nadine Lustre nga gi-ampingan na nila ang ilang mga eksena ni James Reid sa seryeng  Till I Met you. Matud pa ni Nadine nga nitagam na sila sa dihang gipatawag sila sa MTRCB. (BANAT NEWS)