DongYan banhawon karong 2017

CEBU, Philippines - Subling magpares sa serye sa GMA-7 ang magtiayong Marian Rivera ug Dingdong Dantes  ug mahitabo kini karong 2017.

Unang nagparesang duha sa Marimar niadtong 2009 nga nahimong taytayan sa ilang panaghigugmaay.

Gihan-ay pa ang storyline sa ilang upcoming project ug nagpista na og maayo ang ilang Dongyan fans human nakadungog sa maong taho.

Samtang giluto pa ang maong proyekto, busy ang magtiayon sa tagsa-tagsa nila nga mga proyekto sa GMA-7.

Dennis bida sa bag-ong Mulawin?

Gikatahong plantsado na gyud ang comeback  sa  pantaseryeng Mulawin nga gikatahong pagabituonan ni Dennis Trillo.

Ni-post og hulagway sa Instagram ang manager ni Dennis nga si Popoy Caritativo diin kauban nila ang GMA Drama executives  nga sila si Lilybeth Rasonable, Helen Rose Sese, Cheryl Ching-Sy, ug  ang writer nga si RJ Nuevas.

“Meeting para sa pinaka bagong primetime show! #Mulawin2017 #MulingPaglipad #DennisTrillo,” ang caption sa maong hulagway.

Una nga gidungog kaniadto nga ang comeback sa Mulawin ihatag kang Miguel Tanfelix gumikan sa role niini  nga Pagaspas sa Encantadia 2016.

Ang orihinal nga Mulawin  gihimo niadtong 2004 nga gibidahan nila ni  Angel Locsin ug Richard Gutierrez.

Nakalugwa na si Dennis sa karaang Mulawin diin nidala kini isip third wheel nila ni Angel ug Richard.

Ai Ai nagpasalamat kang Kris

Mapasalamaton kaayo si Ai Ai delas Alas ngadto sa TV host nga si Kris Aquino gumikan sa pag-donate niini og P50, 000 alang sa Kristong Hari Church.

Taudtaod na nga  bugnaw ang tinagdan nila ni Ai Ai ug Kris sa usa’g-usa busa nakugang pag-ayo  ang ilang fans sa Instagram post sa komedyanteng aktres.

Nasayran nga usa si Ai Ai sa nangita og paagi nga makatigom og kuwarta alang sa konstruksyon sa maong simbahan.

Adunay mga higayon nga nagpasiugda si Ai Ai og fundraising concert alang sa maong proyekto 

Kylie moabot karon

Usa ka hugyaw nga pag- welcome ang giandam sa fans ni 2016 Miss International Kylie Verzosa alang sa  iyang pagbalik karong adlawa.

Gikatahong maabot si Kylie sa Ninoy Aquino International Airport (NAIA) terminal 2  gikan Tokyo, Japan  alas-5:00 karong hapon.

Nasayran nga duha ka mga homecoming parade ang nagpaabot alang kang Kylie . Mahitabo kini sa Manila ug didto sa Baguio City nga maoy yutang natawhan sa dalaga.

Dakong garbo ang nahatag ni Kylie alang sa nasud human nalangkat niini ang Miss International crown karong tuiga. (BANAT NEWS)