Anak ni Pacman modelo na!

CEBU, Philippines - Nagmaya ang magtiayong Manny ug Jinkee Pacquiao  gumikan kay hingpit na nga usa ka modelo ang ilang kinamaguwangan nga anak nga si   Emmanuel Jr.

Sa miaging adlaw, gihimo na ang contract signing alang sa labing una nga endorsement ni Emmanuel.

Gisunod usab dayon ang photo shoot ug gipasigarbo kini pag-ayo ni Jinkee pinaagi sa pag-post og  mga hulagway ni Emmanuel sa Instagram.

“First endorsement shoot. Gwapo ng anak ko,” suma pa sa caption sa hulagway nga  iyang gi-post.

Aduna’y lima ka anak sila si Manny ug  Jinkee,  kini naglangkob nila ni Emmanuel Jr., Michael Stephen, Mary Divine Grace, Queen Elizabeth ug  Israel.  

Ella nagtukod og dance studio

Nagsugod na ang operasyon sa dance studio nga gipanag-iya sa aktres nga si Ella Cruz.

Nahimutang kini sa Kamuning Road, Quezon City ug gihimo na ang blessing niini sa miaging adlaw.

Suma pa ni Ella nga usa kini sa iyang gikabisihan karong panahona busa todo balanse na siya karon sa iyang oras ilabi na nga duna  pa siya’y nakalinya nga  mga proyekto sa showbiz.

Gawas sa pag-arte, mahiligon si Ella sa pagsayaw busa ang maong klase nga negosyo ang nahuna-hunaan sa aktres.

Nasayran nga kanunay nga nag-viral ang mga dance video nga gi-post ni Ella sa social media.

Polo duna’y negatibong kasinatian kang Baron

Naka-relate si   Polo Ravales sa kalagot nga gibati sa  indie film actor nga si Kiko Matos ngadto kang Baron Geisler.

Sa Facebook post ni Polo, iyang gisaysay nga duna siya’y bati nga kasinatian kang Baron.

Matud pa sa aktor nga kuyog niya niadtong higayona ang iyang  uyab, igsuon ug sister-in-law sa dihang gibastos siya ni Baron.

Tulo ka semana ang nilabay,  nagkakita sila ni Baron sa usa ka coffee shop .   Nakakita ang uyab ni Baron kaniya busa gisultian niini ang aktor.

Imbes nga motagad si Baron kaniya,  nibuhat hinuon kini og  “bad sign” ug aduna kini bastos nga gilitok ug nahitabo kini atubangan sa iyang uyab, igsuon ug  sister- in- law.

“At first nagulat ako, napikon and uminit ang ulo... di ko sya pinatulan kasi alam kong di siya normal. Ayoko rin naman magsisi sa huli baka di maganda ang mangyarii” suma pa ni Polo.

Alex nagpaukyab sa social media

Mipasiaw sa social media ang TV host-actress nga si Alex Gonzaga  pinaagi sa iyang video kung diin gikantahan niya ang tiyan sa nagsabak niya nga igsuon nga si Toni Gonzaga.

Gikanta ni Alex ang sikat na kaayo nga Tatlong Bibe ug iyaha kining gihalad alang sa umaabot niya nga pag-umangkon.

“Pregnancy hormone ng ate, masungit. Akala niya in-invent ko lang ‘yung song, eh,”  tipik sa caption sa maong video. 

Mihatag og malisya gipahunong ni Angel

Panawagan ni Angel Locsin sa ubang netizens nga hunongon na ang pagpakatap og “memes”  nga naghatag og malisya sa kasuod nila ni Luis Manzano ug Jessy Mendiola.

Nasayran nga nitumaw ang mga pagduda nga duna’y espesyal nga tinagdan ang ex-boyfriend ni Angel nga si Luis ngadto kang Jessy  gumikan sa mga hulagway nila  kung diin nag-uban sila sa pagpanuroy.

“Hi! Thanks for your concern. Pero siguro wag na lang tayong mag-bash.Wala rin kasing magandang maidudulot. Hope you understand :),” mensahe pa ni Angel ngadto sa mga tawong nihatag og malisya sa kasuod nila ni Jessy ug Luis.  (BANAT NEWS)