Kadaugang sa mga Bisaya 2014

CEBU, Philippines – Natuboy nga Reyna ng Aliwan 2014 ang pambato sa Sugbo nga si Steffi Aberasturi kung diin napukan niya ang 16 ka mga kandidata gikan sa nagkadaiyang dapit sa nasud. Ang maong kalihukan gipasiugdahan sa Mani­la Broadcasting Company ug Star City. Ang maong tinuig nga kalihukan nahitabo niadtong Abril 26 sa Aliw Theater. Si Steffi maoy nagtangag sa titulong Sinulog Festival Queen 2011. Ang 20- anyos nga si Steffi kasamtangang nagtungha sa University of San Carlos sa kursong Bachelor of Tourism Management (3rd yr).

Dr. Stephanie Tiro –Sitoy

Usa ka Sugbuanong pediatrician maoy napili nga Mrs. Philippines Globe 2014 nga gipahigayon niadtong May 17 sa SMX Aura sa Taguig City. Siya mao si Dr. Stephanie Tiro – Sitoy kung diin napukan niya  ang laing 22 ka mga kandidata gikan sa nagkadaiyang dapit sa nasud.  Usa ka neurologist ang bana ni Stephanie ug duna sila’y duha ka mga anak.  Dili na bag-o ang pagsalmot niya og indigay sa kaanyag.   Si Stephanie maoy 2nd runner-up sa Miss Cebu Tourism 1993 .

Vanessa Walters

Ang modelo nga si Vanessa Walters maoy nilangkat sa titulong Miss Teen Earth 2014 kung diin liboan ka mga tawo ang nilantaw sa maong indigay nga gihimo sa Mall of Asia Arena niadtong May 27.Usa sa adbokasiya sa 14 anyos nga si Vanessa mao ang pag-awhag sa katawhan nga dili gyud magpataka og labay sa mga  basura aron magpabilin nga limpyo ang kadagatan ug kasapaan. Australian ang amahan ni Vanessa samtang taga Dakbayan sa Mandaue ang iyang inahan.

Eva Psychee Patalinjug

Ang 20-anyos nga si Eva Psychee Patalinjug maoy napili nga Mutya ng Pilipinas-Asia Pacific 2014 nga gihimo niadtong August 8 sa Solaire Hotel and Casino sa Parañaque City. Nagsugod siya pagsalmot og indigay sa kaanyag pinaagi sa CVRAA hangtud nga nakoronahan gayud siya isip Miss Palarong Pambansa pipila ka tuig na ang nilabay. Una niyang beauty pageant nga gisalmotan mao ang Miss Mandaue 2013, diin napili siya nga first-runner up.  Siya pud ang Miss Cebu 2014 first runner-up.

Rogelie Catacutan

Napukan sa 23- anyos nga si Rogelie Catacutan ang 28 ka mga kandidata sa Miss Casino Filipino 2018 kung diin siya ang nakaangkon sa main title. Ang maong indigay gipahigayon didto sa Midas Hotel and Casino sa Pasay City niadtong September 19.

Matt Daclan

Kung sa natad usab sa pag-arte ang hisgutan, nihatag usab og dungog sa Sugbo ang 28-anyos nga si Mark Anthony Comendador Daclan nga nailhan sa kadaghanan isip Matt.  Siya ang napili nga Best Actor sa Cinema One Originals diin usa sa iyang gipildi mao si Ketchup Eusebio ug si Angelica Panganiban ang Best Actress. Nabatyagan ang maayong pag-arte ni Matt sa pelikulang “Soap Opera”.

Jamie Herrell

Dili na gyud mabangbang ang katang-an sa natad sa indigay sa 20 anyos nga si Jamie Herrell gumikan kay siya gyud ang nilangkat sa titulong Miss Earth 2014 nga gipahigayon sa UP Theater sa Diliman, Quezon City niadtong November 29. Si Jamie maoy Sinulog Festival Queen 2012 ug siya usab ang napili nga Reyna ng Aliwan niadtong 2013.

Kris Tiffany Janson

Wala makuha ang grand title, apan nakontento gihapon ang kadaghanan  human nahimong 2nd runner-up  si Kris Tiffany Janson sa  Miss Intercontinental 2014 nga gipahigayon didto sa Germany niadtong December 4. Pagsalig sa Ginoo ug sa iyang kaugalingon maoy gipatigbabaw ni Kris sa pagsalmot niya sa maong indigay.