Kasal ni Chiz ug Heart?

CEBU, Philippines - Nagkagubot karon ang mga netizen gumikan sa balita nga napatik sa www.fashionpulis, kabahin sa usa ka kasal nga adto ipahigayon sa Balesin Resort karong February 14, 2015, nga matud pa napalagpot sa orihinal niini nga petsa, aron masingit ang kasal nila ni Heart Evangelista ug Senator Chiz Escudero.

Usa ka Ria Gamboa ang nipatik sa facebook ug nagyawyaw nga dili matud pa mahinayon ang kasal sa iyang higala sa una niining petsa gumikan kay sa maong adlaw kaslon didto ang usa ka celebrity-politician couple.

Wala man tuod nganli ni Gamboa kinsay iyang gipasabot, apan kumbinsido ang mga netizen nga sila si Chiz ug Heart gyud ang gipasabot.

Basi sa sunod-sunod nga comments, nahibaw-an nga suod matud pa nga higala ni Chiz ang tag-iya sa maong exclusive island resort ug gisultihan matud pa sa senador kanus-a ang petsa sa ilang kasal ni Heart.

Subay sa natad sa mga comments sa maong post ni Gamboa, nabutyag nga ang higala nga iyang gipasabot mao ang diay ang TV host nga si Cesca Litton. Si Cesca kanhi uyab ni Jericho Rosales. Nagkauyab sila ni Echo, human usab sa panagbuwag sa aktor ug ni Heart pipila ka tuig na ang nilabay.

Wala hinuon nabutyag kon unsay consolation nga gipadangat sa management ngadto kanila ni Cesca nga  naka pa-reserve na daan sa maong petsa didto sa maong exclusive resort.

Nadine naghinam-hinam sa serye

Gipadayag ni Nadine Lustre nga nagpanikad na siya sa umaabot nga serye nila ni James Reid sa ABS-CBN. Suma pa ni Nadine nga gisugdan na ang production meeting niini ug wala pa’y final nga titulo sa maong serye.

Perfect girlfriend

Tsika pa ni Solenn Heussaff nga matawag niya og “perfect girlfriend” sa iyang  igsuon nga si Erwan  ang aktres nga si Anne Curtis. Suma pa ni Solenn nga masinabtanon nga uyab si Anne.

Maka-focus sa career

Tsika pa sa Pinoy Big Brother big winner nga si Daniel Matsunaga nga wala pa’y babaye nga nakapapitik sa iyang kasing-kasing karong panahona. Suma pa ni Daniel nga makahatag kini og kaayohan kaniya aron maka-focus siya sa iyang career.

Bag-ong isyu

Mikatawa pag-ayo si Maja Salvador sa nigawas nga report nga matud pa nga under kaayo niya ang iyang uyab nga si Gerald Anderson. Suma pa ni Maja nga dako sila og respeto ni Gerald sa usag-usa  busa maayo ang dagan sa ilang relasyon.

Number one fan

Gipadayag sa basketball star nga si Jeron Teng nga “number one fan”  siya ni Jane Oineza. Padayon nga nidiskarte si Jeron ngadto sa aktres ug wala siya magpatandog sa mga negatibong obserbasyon sa ubang tawo ngadto sa kanhi Pinoy Big Brother housemate.

Ang boobs ni KC

Si KC Concepcion maoy cover girl sa Cosmopolitan anniversary issue karong buwana. Apan dili ang iyang cover photo ang gikagubtan sa mga netizen kundili kining hulagway nga iyang gi-upload sa iyang instagram account niining bag-o lamang.

Suma pa sa mga netizen nga lain matud pa tan-awon ang mga boobs ni KC kay laylay na. May mga nikomentaryo sab nga dili matud pa “class” kundili “cheap” na hinuon tan-awon ang aktres niining maong hulagway.

May mga nidapig hinuon kang KC  ug niingon nga “hot” siyang tan-awon.

Mark Gil namatay

Mipanaw na kagahapon ang beteranong aktor nga si Mark Gil gumikan sa sakit nga liver cancer.

Nabugtuan sa iyang kinabuhi ang 52 anyos nga aktor alas otso sa buntag kagahapon.

  Suma pa sa official statement sa kabanay nga Eigenmann, nadiskubrehan sa milabay nga duha ka tuig ang balatian ni Mark ug niadtong Hunyo lang karong tuiga nila nasuta nga nigrabe na ang maong sakit.

“We, the Eigenmann Family, would like to express our heartfelt gratitude to everybody who has shown their concern for Ralph these past few weeks,” statement sa mga Eigenmann.

Si Mark mismo ang nihangyo sa iyang mga kabanay nga kinahanglan nga itago sa publiko ang kondisyon sa iyang panglawas.

Saulogon na diay unta ni Mark o  Raphael Joseph Eigenmann sa tinuod kinabuhi ang iyang  53rd birthday karong  September 25.

Katapusang proyekto nga nahimo ni Mark mao ang primetime series sa ABS-CBN nga The Legal Wife .   Nakahimo na si Mark og kapin sa  100 nga pelikula ug  30 ka  teleserye sulod sa upat ka dekada na niya sa showbiz. “

Anne nagkalami ang tingog

Malipayong gipahibalo ni Anne Curtis nga nagkalami ang iyang tingog sa ikaduha niya nga album. Una na nga gipadayag ni Anne nga dili siya magpaapekto sa mga tawong manaway sa iyang tingog.

Wala pa’y kabalhinan

Gibutyag sa big boss sa Viva Talent Agency nga si Vic del Rosario nga wala pa’y final nga hukom kung asa mobalhin nga network si Sharon Cuneta human kini nibiya sa TV5. Ang Viva maoy naghupot karon sa career sa mega star.

Pakpak Maximo Oliveros!

Nalakip ang pelikulang Ang Pagdadalaga ni Maximo Oliveros sa 10 Great Gay Films from East and Southeast Asia sa  British Film Institute. Mao lang kini ang nag-inusara  nga Pinoy movie nga nasulod sa maong listahan.

Aron dili sum-ol

Kung si Jane Oineza ang pasultihon okay ra kaniya nga dili siya hatagan og ka-loveteam aron mas dako og tsansa nga makatrabaho niya ang lain-laing artista nga lalaki.  Hinuon giklaro sa aktres nga nag-agad ra siya sa ABS-CBN.

Marian mo-absent  sa show

Gibutyag ni Marian Rivera nga mawala siya og duha ka semana  sa dance show niya sa GMA-7 nga Marian gumikan kay aduna siya’y atimanon nga mga importanteng butang. Aduna kini kalabotan sa preparasyon sa umaabot nga kasal nila ni Dingdong Dantes.

Pokwang  milupad sa US

Nilarga dili pa lang dugay si Pokwang sa Amerika alang sa shooting sa umaabot niya nga pelikula nga dunay working title nga "Ms. Edsa Woolworth." Suma pa nga tulo ka semana nga mo-istar si Pokwang sa maong dapit.

Anak ni Ai-Ai  mag-artista

Gipahibalo ni Ai -Ai delas Alas nga andam na gyud nga mosulod sa showbiz ang iyang anak nga si Sancho. Nangita na lang karon ang komedyana og istasyon nga nangita og dugang artista.

Katrina nasagmuyo

Nasagmuyo si Katrina Halili sa report nga tapuson na sa dili madugay ang seryeng Niño sa GMA-7.  Suma pa sa aktres nga mingawon gyud siya og maayo sa mga kaubanan niya sa maong serye.