Kasikas sa Sandugo sa Let’s Fiesta!

CEBU, Philippines -  Nagmalampuson ang pagtikang ni Regine Velasquez-Alcasid ug ang mga bitoon sa seryeng Niño sa Bohol kinsa nagsaulog dili pa lang dugay sa ilang Sandugo Festival.

Bisan pa man sa pagbundak sa uwan, wala kini nahimong babag sa taga Bohol sa paghugop sa Bohol Wisdom School sa Tagbilaran City aron mosaksi sa  Kapuso Fans' Day ni Regine.

Sa pagsugod pa lang, nakighugyaw na sa mga Boholanon ang Songbird impersonator nga si Ate Redg ug nahimo siya nga co-host ni Yuri Deldig .

Naukay usab og samot ang  audience sa dihang nidalit sa iyang talent sa pagsayaw ang  Kapuso dancing pro nga si Julian Trono kung diin gibitad gyud niya ang usa ka  dalagitang Bol-anon aron ubanan siya sa pagsayaw sa entablado.

Samtang nikanta usab si  Bianca Umali og  Born This Way ni Lady Gaga ug nihataw sab kini og maayo sa  dance floor.

Wala pud nagpaulahi sa pagpakita sa iyang  song and dance number ang bida sa  Niño  nga si  Miguel Tanfelix. Nitikang sa maong show ang direktor sa Niño  nga si Direk Maryo J. de los Reyes nga usa usab ka Bol-anon.

Nisamot usab pag-abiba ang mga tawo sa dihang nitungtong na sa entablado si Regine. Si Regine maoy host sa umaabot nga reality talent show sa GMA-7 nga  Bet ng Bayan .Gikanta niya ang Visayan  song  nga Usahay.

"I really appreciate you guys coming here tonight. Alam n'yo, the resilience that you have is a blessing. It's so inspiring to see you guys are here and moving on.   Alam n'yo po kung ano ang kahanga-hanga sa inyong lahat? Despite the tragedies you faced, you guys are still smiling," mensahe pa ni  Regine ngadto sa mga Bol-anon. Malantawan ugma sa buntag sa  programang Let's Fiesta!  sa GMA-7 ang mga kasikas sa 2014 Sandugo Festival.

Katin-awan

Gihimakak ni Matteo Guidicelli ang report nga matud pa nanluod siya sa iyang girlfriend nga si  Sarah Geronimo gumikan kay wala kini mouban kaniya sa Ironman event nga gipahigayon dinhi sa Sugbo sa miaging semana. Suma pa ni Matteo nga nakasabot ra siya sa ka-busy ni Sarah.

Absent sa taping

Nananghid si Christopher de Leon sa production staff sa seryeng Ikaw Lamang Book 2  nga dili siya makatunga sa taping sulod sa pipila ka adlaw gumikan kay kinahanglan niya nga molarga sa Amerika gumikan kay nasakit ang iyang anak kinsa na-confine karon sa tambalanan. Suma pa sa aktor nga kinahanglan nga motagana siya og oras alang sa iyang anak nga si Miguel.

Designer ang peg

Gibutyag ni Xian Lim nga siya mismo ang mibarog nga interior designer sa gipatukod niya nga balay sa Antipolo.Nihatag usab og dugang mga ideya kaniya ang iyang inahan.

Star ug Viva mag-uban

Ang Star Cinema maoy gihimong partner sa Viva Films alang sa pelikulang Talk Back and You're Dead, ang ikaduhang  pelikula sa magka- love team nga sila si James Reid ug  Nadine Lustre. Ang duha maoy bida niadto sa blockbuster movie nga Ang Diary ng Panget.

Gipapas dayon

Dali nga gipapas ni Francine Prieto ang tweet niya kung diin iyang gisaway si Mike Enriquez. Gitawag matud pa ni Francine si Mike og "panget". Giingong nakadawat og daghang pagsaway si Francine sa iyang gibuhat busa gipapas niya ang iyang gi-post. Wala hinuon niya gidetalye ang rason kung nganong gipikhan niya si Mike.

Asawa ni Derek mihimakak

Gihimakak ni Mary Christine Jolly ang alegasyon sa kampo ni Derek Ramsay nga matud pa gipangayoan niya kini og kapin sa P40 million. Samtang wala motambong si Derek sa preliminary hearing sa miaging adlaw sa kasong giatubang niya nga gipasaka ni Mary Christine.

Okay ra ni Jessy

Bukas si Jessy Mendiola sa posibilidad nga makauban niya sa trabaho ang iyang ex-boyfriend nga si JM de Guzman. Suma pa ni Jessy nga usa ka maayong aktor si JM busa wala'y problema kaniya nga makauban niya kini sa proyekto.

Deniece nameligro

Gibutyag sa abogado ni Deniece Cornejo nga si Atty. Ferdinand Topacio nga nameligro ang kinabuhi sa iyang kliyente sa Camp Bagong Diwa. Kahinumduman nga gibasura sa korte ang hangyo ni Deniece nga ipabilin siya sa Camp Crame.

TV comeback

Masaksihan na karong hapon ang subling pag-arte ni JM de Guzman sa telebisyon.  Malantawan si JM sa episode karong hapon sa legal anthology nga "Ipaglaban Mo" sa ABS-CBN. Kahinumduman nga nawala og dul-an sa usa ka tuig si JM sa showbiz gumikan sa pagkagumon niya sa drugas.