Anne mogama og new album

CEBU, Philippines - Gikatakdang mogama og bag-ong album si Anne Curtis karong tuiga ug lakip na niini ang major concert niya sa Araneta Coliseum. Suma pa ni Anne nga magpungasi og maayo ang dagan sa iyang career karong tuiga ug hingpit na niya nga gikalimtan ang mga kontrobersiya nga iyang nasugatan sa miaging tuig.

Solo song number

Nagpasalamat si Martin Nievera sa mga kadagkoan sa ASAP gumikan kay gibalik na ang iyang  solo song number sa maong show. Nasayran nga taud-taud na nga ni-perform ang concert King sa ASAP nga dunay mga kauban sa entablado.

Pinay nakadaug sa India

Ang Pinay nga si Sandy Talag maoy nakadaug isip best actress sa bag-ohay lang nahuman nga Jaipur International Film Festival didto sa India . Kini gumikan sa maayong pagdala niya sa pelikulang Lilet Never Happened.

Carl mibalhin sa TV5

Sa pagbalhin ni Carl Guevarra sa TV5, duha dayon ka mga programa ang nisugat kaniya. Kini naglangkob sa Pretty Little Liars ug Trenderas. Suma pa nga 10 siya ka buwan nga wala'y proyekto sa GMA-7 busa nakahukom siya nga mobalhin na lang sa TV5.

Suwerting numero

Gipadayag sa manager ni Dennis Trillo nga si Popoy Caritativo nga gibase gyud niya sa feng shui ang pag-renew og kontrata sa iyang alaga sa GMA-7 niadtong February 17. Suma pa niya nga ang 17 maoy lucky number ni Dennis karong tuiga.

Lucky charm

Gipadayag ni Iza Calzado nga giisip niya nga lucky charm si Direk Olive Lamasan gumikan kay mao kini ang ugat sa kalampusan sa pelikulang Starting Over Again nga gibidahan nila ni Piolo Pascual ug Toni Gonzaga.  Dakong garbo alang kang Iza nga nalakip siya sa maong pelikula.

Enrique ug Sam nakapuntos

Nakauyon si Marjorie Baretto sa mga kauban sa iyang anak nga si Julia sa seryeng Mirabella nga naglangkob nila ni Enrique Gil ug Sam Concepcion.  Suma pa ni Marjorie nga buotan ang nahisgutan nga mga aktor busa komportable ra siya nga mao kini ang katrabaho sa iyang anak.

Sarah maninuod na gyud

Tsika pa ni Sarah Lahbati nga gihigugma gyud niya ang pag-arte busa ipasalig niya sa iyang fans nga iyaha na gyud nga ampingan ang career. Nakalinya na ang mga proyekto ni Sarah karong tuiga.

Kris gitugtan na ni Bimby

Nakadawat na "go signal" si Kris Aquino gikan sa iyang anak nga si Bimby nga makabaton og hinigugma. Suma pa sa TV host nga magpaabot ra siya niini ug wala siya magdali.  "Bimby told me something wonderful kanina. Sabi niya, 'Mama, because you brought me all my games, I want you to be happy, you can already have a boyfriend but no breaking up," suma pa ni Kris.

Manamilit na

Kutob na lang karong March 7 ang seryeng 'Got To Believe' nga gibidahan nila ni Kathryn Bernardo ug Daniel Padilla. Nanghinaut si Daniel nga  sila gihapon ni Kathryn ang sunod nga magpares sa sunod nila nga TV project. Apan gipasalig sa aktor nga iyang respitohon kung unsa man gani ang hukom sa iyang mother network.

Jackie ihulip ni Charee

Si Jackie Rice maoy gipanglantawan nga ihulip ni Charee Pineda sa role niini  sa  pelikulang Sitio Camcam. Una na nga gibutyag ni Charee nga nahadlok siya nga maguba ang iyang imahe isip konsehal sa Valenzuela City kung modawat siya og sexy role.

Xian wala madutli

Mapasalamaton si Xian Lim ngadto sa iyang fans gumikan  kay nagpabilin kini nga miidolo kaniya bisan pa man sa mga negatibong isyu  nga nanggawas batok kaniya. Suma pa ni Xian nga mo-focus na lang siya sa iyang trabaho ug dedma lang siya sa mga intriga.

Dakong buhi

Wala nahimuot ang komedyanteng aktor nga si Don Pepot sa nanggawas nga taho nga matud pa dugay na siya nga namatay.  "Heto buhay na buhay ako!," suma pa niya.

Paspasan

Tsika pa ni Aiza Seguerra nga nagsugod na siya og inquire kung unsa nga mga dokumento ang iyang gikinahanglan sa plano nila nga pagpakasal sa iyang uyab nga si Liza Diño didto sa Amerika.  Paspasan kini sa singer aron matuman na gyud ang iyang pangandoy nga mapakaslan ang iyang girlfriend.

Kapuso Bangka gipanghatag na!

Pormal na nga giapod-apod kagahapon ang 100 ka mga bangka sa pipila ka mga mananagat didto sa Bantayan Island. Ubos kini sa Kapuso Adopt-A-Bangka Project.

Nitekang gyud didto sa isla si Kapuso Primetime Queen Marian Rivera kagahapon kauban nila ni Oliver Amoroso, Vice President for Regional Sales ug Ann Marie Tan, GMA7 Cebu Station Manager.

Nagkanayon si Tan nga nahinabi dinhi sa Banat News Hugyaw nga hugyaw ang nahimong seremonya sa pag apod-apod sa mga bangka gumikan kay nisaksi usab niini ang tibuok pamilya sa mga mangingisda.

Matud pa niya nga puwerting lipaya sa mga mangingisda gumikan kay mahibalik na gyud ang ilang panginabuhian

Una na nga gipadayag ni Marian nga ang tumong sa maong proyekto mao nga tabangan nga makabangon ang mga residente sa northern Cebu nga labing naapektuhan sa bagyo'ng Yolanda.

Gipasiugdahan sa aktres ang maong programa uban sa  Bantayan Island Association of Hotels, Resorts, Bars and Restaurant Inc. ug GMA Regional TV.

Gipailawom niadto ang  beneficiaries og  usa ka pre-selection process ubos sa pagdumala sa GMA Central and Eastern Visayas station, ug ang mga napilian gi-verify sa Back to Sea Project organizers nga partner sa maong proyekto.

Nahunahunaan ni Marian ang maong proyekto  sa dihang miadto siya sa usa ka dapit sa amihanang dapit sa Sugbo niadto aron sa paghatag og relief goods. Miingon ang aktres nga dili kada adlaw dunay muhatag og relief goods sa mga residente busa nakahukom  siya nga muhatag niini og kapanginabuhian ug didto nahimugso ang nahisgutang proyekto.

Jolina nanganak na!

Nanganak na kagahapon sa alas 2:51 sa hapon ang singer nga si Jolina Magdangal  sa ilang labing una nga anak  sa iyang bana nga si Mark Escueta.

Usa kini ka lalaki ug ila kining ginganlan og Pele Iñigo. Kahinumduman nga sukad pa sa miaging buwan, nagpanikad na og maayo si Jolens nga makakita sa iyang liwat.

Sa Asian Hospital nanganak si Jolina pinaagi sa caesarean section ug ang bata adunay gibug-aton nga 6.8 pounds ug 50 centimeters ang gitas-on niini.

Suma pa nga ultrasound ug check-up lang unta ang rason ni Jolens sa pagtikang niya sa tambalanan kagahapon apan gipangagian na ang aktres/TV host/ singer, hinungdan nga nihukom ang OB-gyne niini nga si Dr. Madeline Florendo nga i-ceasarean na lang ang nahisgutan.

Nasayran nga sa unang semana sa Pebrero, ganahan na nga magpa-confine si Jolina sa tambalanan apan gipapauli kini sa doktor gumikan kay wala pa siya nagbati niadtong higayona.

Mapasalamaton si Jolina gumikan kay dili lalim ang iyang kasinatian sanglit  talandugon ang iyang pagsabak busa gipa- bed rest pa siya kaniadto.

Ronnie nakadunggab

Bag-ohay lang nahuman ang shooting sa pelikula ni Ronnie Liang nga Esoterica Manila  ug giangkon niya nga nadunggaban niya sa  ulo ang  co-star niya sa maong pelikula apan giklaro niya nga wala kini tuyoa.

Matud pa niya nga aksidente lang gyud ang nahitabo gumikan kay naglihok ang kauban niya sa action scene busa naigo ang ulo niini sa gidala niya nga kutsilyo.

 "Kasi sa isang action scene, kailangan ko siya kasing saksakin.Pero siyempre controlled at dapat dito ,  umano yung ulo niya.Kaya yung tantiya ko, sa shoulder. Kaso, napaganun  siya.Nung gumanun yung ulo niya, tinamaan ng kutsilyo... nasaksak ko siya," tsika pa ni Ronnie ngadto sa PEP.

Bisan pa man sa maong hitabo, nagpadayon ang shooting ug nagpasalamat siya gumikan kay dili kaayo dako ang samad sa tawo nga naigo sa kutsilyo.

"Aksidente naman, e, kaya naintindihan niya. Mabuti na nga lang at hindi iyon bumaon ng todo," dugang pa sa singer.

Samtang todo ang pagpa-sexy ni Ronnie sa Esoterica Manila  apan iyang gipasalig nga makauyon niini ang iyang fans.

"This is something new na ma-o-offer ko sa public, ibang Ronnie Liang nga yung makikita dito.Kundi yung si Mario, yung character ko dun sa movie," suma pa niya,

Sa trailer sa maong pelikula , adunay  eksena kung diin  naka-underwear lang  si Ronnie sa kuwarto. Wala hinuon mabalaka si Ronnie sa posibleng epekto niini sa iyang  wholesome image gumikan kay parte ra man kini sa iyang trabaho.