Eugene: “If this would be my last movie, I’m happy”

CEBU, Philippines - Labing unang higayon kini nga misalmot sa Metro Manila Film Festival ang Kimmy Dora ni Eugene Domingo ug masaligon siya nga ang misuporta sa unang duha ka pelikula mupaluyo gihapon kaniya sugod ugma, December 25, diin magsungag na ang walo ka mga entry sa festival karong tuiga.

“This is the perfect venue for Kimmy Dora as our last time. This (festival) is a celebration and I want Kimmy Dora to be part of that celebration,” nagkanayon si Eugene Domingo ngadto sa mga sakop sa E-Group (Cebu Entertainment Group) nga nitambong sa iyang presscon diha sa Casa Amparito niadtong Sabado sa udto, diin kauban niyang nitekang dinhi sa Sugbo ang iyang leading man nga si Sam Milby. 

Suma pa ni Eugene nga una na nilang giplano nga ilakip ang Kimmy Dora sa maong festival sa nilabay nga tuig apan gihimo matud pa niya ang award-winning movie, “Babae Sa Septic Tank” hinungdan nga wala kini mahinayon. Apan nisaad siya ngadto sa usa sa mga producers sa maong franchise movie nga si Piolo Pascual nga musalmot gyud sila sa MMFF, hinungdan nga iya kining gituman karong tuiga.

“This is so special to me. I believe this is the best of the three,” pasigarbo pa ni Eugene. Dakong garbo pud niya hugyaw ang camera nga gigamit sa katapusang installment sa Kimmy Dora movie, sanglit susama kini sa gigamit sa Hollywood movies: Harry Potter ug Star Wars. 

Ang Kimmy Dora: Kiyemeng Prequel, dili maoy labing unang higayon nga nagkauban sa pelikula sila si Sam ug Eugene, apan kini ang labing una nga pares sila ug dako kaayo ang role sa actor nga giisip sa aktres nga “The James Bond of the Philippines.”

Suma pa ni Eugene maayo kaayo si Sam sa iyang action scenes dinhi niining maong pelikula. “I was really surprised that he can do action. Hindi ko naman sasabihin na James Bond kung hindi ko alam ang sinasabi ko. I’m a fan of James Bond,” pagtin-aw pa ni Eugene kinsa gitawag na karon og “The Global Actress” ug “Darling of Asian Cinema.”

 Apan giklaro ni Sam nga dili matud pa kataw-anan ang iyang character dinhi, si Eugene ra maoy nag-comedy.

“Bilang isang fan, I feel very blessed. Malaking following ng Kimmy Dora,” ni Sam pa.

Giasoy ni Sam nga kun makabaton og kahigayonan, buot gayud niya nga makahimo og action movies sa umaabot. Suma pa niya kaya niya ang mga action movies nga sama sa Bourne Identity.

Kahinumduman nga nagsilbi nga launching movie ni Eugene ang Kimmy Dora: Kambal sa Kiyeme niadtong 2009 pinaagi sa Spring Film. Nahugyaw ang publiko niini gumikan kay mihipos kini og P100 million nga gross sales sulod lamang sa pipila ka semana nga pagsalida—kalambuan kadto nga wala damha gumikan kay social media(Facebook ug Twitter) lamang ang publicity vehicles niadtong maong pelikula. Hinungdan nga niadtong 2012 nasundan kini og Kimmy Dora and the Temple of Kiyeme nga nagmalampuson gihapon sa takilya.

Niining ikatulo ug katapusan nga pelikula ni Kimmy ug Dora, mutuyok ang istorya sa internship sa Go Dong Hae sisters.

Ang Summa cum laude nga si Kimmy mupakita na og senyales sa iyang pagkamaayo nga leader samtang si Dora mupabatyag usab sa iyang bulawanong kasingkasing pinaagi sa pakighugoyhugoy sa ilang mga kawani.

Isip interns magsugod sila sa labing ubos nga posisyon sama sa pagtrabaho isip security guards ngadto na sa pagka flight attendants.

Ang ilang training ipaubos sa pagdumala sa gwapo ug sexy nga Human Resources head nga si Rodin Bartolleti (Sam).

Sa pikas bahin, atol sa presscon niadtong Sabado giangkon ni Eugene nga na-emosyonal siya sa katapusang adlaw sa shooting niining maong pelikula. “I was sentimental. I put on my make-up as Dora, took a picture and thanked my face. Same din sa Kimmy, I took a picture also. I think they (Kimmy and Dora) are really my sisters. If this would be my last movie, I’m happy,” dugang pa niya.                     

Gipadayag ni Eugene nga dako na kaayo niyang kalipay kun masulod sa top 3 sa box-office returns ang iyang pelikula, sanglit labihan ka lig-on ug star power sa iyang mga kontra.

“Hindi naman ako bulag. They have the means to promote. But sanay na ako,” matud pa sa aktres.

Unom ka pelikula ang nahimo ni Eugene karong tuiga busa gibutyag niya nga maghinay-hinay lamang una siya karong 2014.

Buot niya nga mag-gardening ug musalmot og mga festivals lamang ang iyang buhaton sunod tuig. Feeling pud niya sa 2014 magka lovelife na siya. Time management ra matud pa ang tanan ug nabatyagan niya nga sunod tuig na ang tukmang panahon aron mahigugma ang iyang kasingkasing.

Ang Kimmy Dora: Ang Kiyemeng Prequel sinuwat ni Chris Martinez ug ubos sa direksyon ni Bb. Joyce Bernal. Ubos sa Spring Films, co-producer niini ang Quantum Films ug MJM Productions.  Lakip gihapon sa cast sila si Ariel Ureta, Angel Locsin, Moi Bien ug Joel Torre. Ug matud pa mag-cameo ang unang duha ka leading men ni Eugene nga sila si Dingdong Dantes ug Zanjoe Marudo kauban ang daghan pa kaayong mga sikat nga personalidad.

Kining maong pelikula mubukas sa mga sinehan ugma puhon isip tipik sa Metro Manila Film Festival.