Miss Mandaue 2013 Darling of The Press Rayna

CEBU, Philippines - Sama sa napanlantawan kadaghanan sa nangagi nga mga pre-pageant activities, ang  Tourism student  sa University of San Carlos nga si Steffi Rose Aberasturi  maoy nakalangkat sa korona nga Miss Mandaue 2013 nga gipahigayon niadtong Martes sa gabii sa Heritage Plaza sa maong dakbayan.

Si Steffi kinsa maoy natuboy nga Darling of the Press misaysay ngadto sa mga tigbalita nga wala siya magdahom sa resulta sanglit gihulagway niya nga puros mga lig-on ang kandidata sa Ms. Mandaue.

“”Maayo gyud sila manubag tanan, ang ako lang kay nag-enjoy ra gyud ko sa pageant,” matud pa ni Steffi.

Kadaghan nga higayon nga nisalmot siya og mga indigay ug pipila sa iyang mga titulo naglangkob sa Miss Campus Fame 2012, Sinulog Festival Queen 2012 ug Miss CESAFI 2013 first-runner-up.

Aktibo usab si Steffi sa mga fashion show sanglit sakop man siya sa OZAR Models ni Danny Booc.

Nagpasalamat pag-ayo si Steffi  ngadto sa iyang pamilya ug mga higala nga maoy nagdasig kaniya nga mosalmot sa Miss Mandaue 2013.

Matud pa niya nga iya gyud nga buhaton ang iyang mga responsibilidad isip Miss Mandaue ilabi na nga magpabilin nga ilado ang maong lugar ngadto sa publiko.Igsuon ni Steffi si Miss Mandaue 2011 first runner-up nga si Crystal Star.

Target run niya nga mosalmot og laing mga dagkong indigay sama sa Miss Cebu.

Ang ubang mga mananaug sa Miss Mandaue 2013 naglangkob nila ni Marie Michelle Puclie (1st runner-up), Eva Patalinjug (2nd runner-up), April Smith (3rd runner-up) ug Mhon Theress  Menaling (4th runner-up).

Ang mga  beauty queen ug produkto usab sa Ms. Mandaue nga sila Anna Maris Igpit ug Sean Maynard maoy  hosts  sa maong indigay .

Nahugyaw usab pag-ayo  ang katawhan sa dihang nisaka na sa entablado ang Kapamilya actor nga si Xian Lim kinsa nidalit og tulo ka mga kanta.

Giuwanan usab sa masipang pakpak ang song numbers sa mga sakop sa Junior Troubadours Band kung diin gidalit nila ang popular nga mga RNB songs.

Napuno sa pakpak ang production number sa mga kandidata diin gisul-ob nila ang costume nga pang elegante sa karaang panahon.

Samtang gibutyag ni  Mandaue City Mayor Jonas Cortes nga kanunay na gyud nga atangan sa kadaghanan ang Miss Mandaue busa gihatagan gyud kini og pagtagad sa iyang administrasyon. (BANAT NEWS)