Karylle giisnab ni Marian?

CEBU, Philippines - Gihimakak ni Karylle ang report nga matud pa nagdedmahay sila ni Marian Rivera sa dihang nagkaabot sila sa bag-ohay lang nga Dolphy: Alay Tawa sa MOA Arena.

Suma pa ni Karylle nga wala siya kabantay sa presensya ni Marian gumikan kay late na siya nga naabot sa nahisgutang kalihukan.

Apan duna'y nakakita nga katupad ni Karylle nga nanan-aw sa show ang iyang inahan nga si Zsa Zsa Padilla ug ang igsuon niya nga si Zia Quizon.

Sa dihang miagi si Marian, sila si Zsa Zsa ug Zia ra ang gibeso-besohan sa aktres ug gilaktawan si Karylle.

 Apan giklaro ni Karylle nga wala gyud siya kakita ni Marian niadtong higayona hinungdan nga nihangyo siya nga dili tuohan ang maong istorya.

Wala'y klaro nga rason sa ugat sa panagbangi sa duha apan ang mga himantayon nga nagsugod kining tanan sa dihang nauyab ni Marian ang ex-boyfriend ni Karylle nga si Dingdong Dantes.

Sam ug Pokwang magpares

Gipasalig ni Sam Milby nga dili na siya kinahanglan nga mag-adjust sa panagpares nila ni Pokwang sa pelikulang Crazy Love. Suma pa ni Sam nga suod sila nga higala ni Pokwang busa komportable sila sa usag-usa.

Amy nagtrabaho gihapon

Nagpadayon si Amy Perez sa shooting sa pelikulang Si Enteng, Si Agimat and Me bisan pa man nga nagsabak siya karon. Giingong tiwason na lang ni Amy ang maong proyekto gumikan kay dili puwede nga maguba ang dagan sa istorya sa script.

Julielmo nangabot na gyud

Nalangan ang pag-abot nila ni Julie Anne San Jose ug Elmo Magalona dinhi sa Pilipinas gumikan sa technical problem nga nasinati sa gisakyan nila nga eroplano gikan sa Los Angeles, California. Ang duha naabot niadtong Biyernes.

Absent

Daghan ang nangita sa presensya nila ni Claudine Barretto ug Smokey Manaloto, sa tribute concert nga Dolphy, Alay Tawa. Ang duha nakauban ni Dolphy isip mga anak sa sitcom nga Home Along Da Riles. Wala hinuon mohatag og rason ang duha sa wala nila pagtikang sa maong kalihukan.

Kever ang show

"Yes, I'm ready," mao kini ang tubag ni Hayden Kho sa pangutana kung andam ba siya nga makauban sa mga proyekto ang mga kanhi niya nga uyab nga sila si Katrina Halili ug Maricar Reyes. Kahinumduman nga nasulod kanidto sa kontrobersya ang maong duha ka mga aktres gumikan kay duna sila'y tagsa-tagsa ka sex video uban kang Hayden.

Nadine ug Emerson buwag na

Nagbuwag na sila si Nadine Samonte ug ang iyang non-showbiz boyfriend nga si Emerson Chua. Kahinumduman nga gidungog kaniadto nga nagplano na ang duha nga magpakasal.

Nataypan sa publiko

Matud pa nga mubo ra gyud diay unta ang karakter ni Tom Rodriguez sa Be Careful With My Heart apan gi-extend kini human gihangop sa publiko ang tandem nila ni Aiza Seguerra sa maong serye.

Ikaw na gyud Jessica!

Gihatagan og standing ovation sa mga tawo ang garbo sa mga Pinoy nga si Jessica Sanchez atol sa American Idol World Tour sa Araneta Coliseum niadtong Biyernes sa gabii. Pipila sa mga gipangkanta ni Jessica naglangkob sa "What Around Comes Around," "How Come You Don't Call Me" "Proud Mary" ug uban pa.

Paris nag-sorry sa mga bayot

Nangayo og pasaylo si Paris Hilton ngadto sa gay community gumikan sa napagawas niya nga komento nga wala mauyoni sa mga kabayotan.

Kahinumduman nga na-rekord ang tingog ni Paris sa usa ka Taxi Cab sa dihang misaysay kini nga law-ay ang mga bayot ug kasagaran niini naghambin og AIDS.

Suma pa ni Paris nga sensiro ang pagpangayo niya og pasaylo ug matud pa niini nga isog og personalidad ang mga kabayotan ug gihulagway niya kini nga "inspiring people".

Kris gihulipan ni Ai-Ai

Dili na madayon si Kris Aquino sa himoon niya nga pelikula sa Star Cinema nga Sisteraka nga entry sa Metro Manila Film Festival (MMFF) 2012.

Suma pa sa report nga igo nga mituman si Kris sa mando sa iyang doctor nga dili magpalabi sa trabaho gumikan kay duna kini problema sa iyang tingog.

Ang komedyanteng aktres nga si AiAi delas Alas maoy mohulip sa karakter ni Kris sa nahisgutang pelikula.

 Nasayran nga puwerting bisiha ni Kris gumikan kay gawas sa programa niya nga Kris TV na, nalakip usab siya sa serye nga Kailangan Ko'y Ikaw. Nagkaduol na usab ang pagbalik sa Pilipinas Got Talent kung diin usa siya sa mga hurado niini. (BANAT)