Bigbang

CEBU, Philippines - Korean Pop o KPOP ang uso karon sa mga kabatan-onan, diin mga singer o grupo sa mga lalaki o babaye ang mokanta ug mosayaw. Ang maong singer o grupo gitawag ni og “Idol”. Kasagaran ang “Idol” sa South Korea mga teenagers o batan-on ang mga fans. Apan adunay usa ka “Idol group” nga lahi sa uban. Kining grupo sa mga lalaki nga adunay lima ka miyembro dili lang mga batan-on ang ilang mga fans, hasta pud ang mga hingkod na ang pangidaron. Matag miyembro adunay managlahi og talento nga maoy nakapa-unique nila itandi sa ubang idol. Dili lang isip grupo apan isip pud solo artist.

Sila mao ang BIGBANG. Usa ka idol group sa South Korea nga ubos sa YG Entertainment. Adunay lima ka miyembro nga sila si: Kwon Jiyong mas nailhan sa screen name nga G. DRAGON/GD ang leader, Choi Seung Hyun o gitawag og T.O.P/TABI ang main rapper, Dong Yong Bae o mas gitawag og Taeyang/Sol ang lead vocal, Kang Daesung o gitawag sa screen name nga Dae/D-Lite. ang main vocal sa grupo, ug ang kamanghuran sa grupo mao si Lee Seung Hyun o mas sikat sa ngan nga Seungri/V.I mao ang vocal/maknae.

Ang BIGBANG nag-debut niadtong August 19, 2006 diin ilang gihugyaw ang mga tawo sa ilang style sa pagkanta ug ang ilang lahi nga genre sa kanta. Diin sila mismo ang naghimo kasagaran sa ilang mga album. Hingpit nilang nakuha ang ilang kasikat sa ilang kanta nga “Lies” sa tuig nga nag-debut sila, diin pito ka sunod-sunod nga semana silang na number one sa usa sa labing sikat nga music chart sa South Korea. Sa tuig 2007 hangtod 2008 daghan na sila og nadawat nga pasidungog lakip na ang “Best Male Group”, “Song of the Year”, “Artist of the Year”, ug “The Grand Award” gikan sa labing prestihiyosong award ceremony sa South Korea, ang  Seoul Music Awards.  Sa tuig 2009-2010 nag-debut sila sa Japan, diin gibotaran sila isip “the Korean group that Japanese fans wish to see the most” sa mga Hapon. Sila usab ang kina-unhang langyaw nga gipasidunggan isip “Best New Comer” sa Japan Cable Broadcasting Station ug “Best New Artist” sa MTV Japan. Sa tunga-tunga sa ilang promotion sa Japan, naghimo usab sila sa ilang solo activities, diin si G Dragon, Taeyang ug Seungri nag-release og solo albums. Si T.O.P nisulod sa pagka-artista ug nakadawat og mga pasidungog sa iyang acting.. Si Daesung ug Seungri nisulod usab pagka-artista ug si Daesung nahimong host sa mga sikat nga mga variety show sa Korea. Sa tuig 2011, subli sila nga naghiusa ug ni release og bag-ong album nga “Tonight”. Sa maong tuig usab, gipasidunggan sila isip “Best Worldwide Act” sa 2011 MTV Europe Music Awards.

Karong tuiga, nag-release sila sa ilang ika-lima nga mini album, ang “Alive” ug nagpahigayon usab sila sa ilang come-back concert ang “Alive Tour” diin mao ang ilang labing una nga concert gawas sa Korea, nga ipahigayon sa 25 ka siyudad sa 16 ka nasud. Karon lang pud nga tuiga daghan na silang nadawat nga pasidungog sulod ug gawas sa Korea. Usa niini ang “Best Fan” sa gipahigayon nga 2012 MTV Italy Music Awards. Karong Agosto 19 ipahigayon ang ilang ika-unom nga anibersaryo ug karong umaabot nga Oktubre 24, ang Bigbang magpahigayon sa ilang labing unang concert sa nasud sa SM Mall of Asia Arena nga maoy labing gipaabot sa mga V.I.P., (ang tawag sa mga fans sa Bigbang). (BANAT NEWS)