Mga Sugbuanon sa "Wedding of the Year"

CEBU, Philippines - Dili ikalimod ang gibati nga tumang kalipay ug dakong garbo sa Sugbuanong magpapatigayon nga si Felix "Bhoy" O. Tiukinhoy, Jr. isip usa sa mga principal sponsors sa umaabot nga "Wedding of the Year" tali nilang Valenzuela City Councilor Shalani Soledad ug Pasig Rep. Roman Romulo nga karon nang Domingo didto sa St. Benedict Church sa Ayala Westgrove Heights, Sta. Rosa, Laguna. Tiaw mona nga igkauban ni Tiukinhoy ang mga bigatin ug bangiitang personalidad nga gisangonan sa maong espesyal nga tahas nga naglangkob nilang Sen. Ping Lacson, Foreign Affairs Secretary Alberto del Rosario, PLDT-Smart-TV 5 chairman Manny V. Pangilinan, San Miguel president Ramon Ang, Bench founder Ben Chan ug uban pa.

Lain pang Sugbuanon nga gikuhang principal sponsor sa maong engrandeng selebrasyon mao si Elizabeth Gan-Go, ang presidente sa Elizabeth Gan-Go Group of Companies kansang mga higanteng patigayon naglangkob sa E-Mall. Siya mao ang pinangga nga kapikas ni Atty. Augusto W. Go, ang tag-iya sa University of Cebu.

Sa dihang gipangutana sa Banat Hugyaw kun unsay iyang gibati nga mga bigtime ang iyang igkauban og martsa atol sa maong bonggang kalihukan, daw di ma-undang sa iyang tingsi si Tiukinhoy.

"Siyempre lipay kaayo ko. Proud kaayo ko isip usa sa mga principal sponsors sa kasal nilang Shalani ug Roman. I'm so excited that I will be there on that big day," matud pa ni Tiukinhoy, nga mao ang presidente sa Virginia Foods, Inc.

Matud pa ni Tiukinhoy nga suod nga pamilya ug haduol kaayo sa iyang dughan si Shalani ug gani gi-isip pa siya sa Will Time Bigtime host on-leave nga "surrogate father" kon ama-amahan. "Iya pa gani ko gipadad-an og picture nga kami rang duha ug dunay note nga 'Proud to be your ampon'," dugang pa ni Tiukinhoy. Si Tiukinhoy, nga mao sab ang kasamtangang pangu sa Philippine Association of Meat Processors of the Philippines, Inc. (PAMPI) - puwesto nga iyang gihuptan sud sa milabay na nga 13 ka tuig - simple nga tawo apan dugay nang nagmarka sa iyang pangan sa mga Sugbuanon ilabi na sa natad sa paugnat sa kusog isip commissioner sa Cebu Schools Athletic Foundation, Inc. (CESAFI).

 "Congratulations to a wonderful couple. Wishing you a lifetime of the greatest joy, love, and happiness. Your wedding day may come and go, but may your love forever grow," dason pang Tiukinhoy sa dihang gipangayoan sa iyang mensahe ngadtong Shalani ug Roman.

Gibana-bana nga moabot ngadto sa 900 ka mga bisita ang magsawo sa bangkete nga idalit kanila didto sa Evolving Center Dockside, Nuvali, Sta. Rosa, Laguna karong January 22.