Pasko sa Kalunasan

CEBU, Philippines - Mahitabo na ugma sa gabii, Disyembre 22 ang usa ka Christmas Concert nga ipahigayon diha sa Barangay Kalunasan Sports Complex.

Masaksihan usab sa maong kalihukan ang nagkadaiyang talento sa mga sakop sa Kalunasan Youth Performing Arts (KAYPA) nga gidumala ni Konsehal Marvin Leyson.

Ang maong kalihukan tipik sa pagsaulog sa Pasko sa Kalunasan nga gibuksan niadtong Disyembre 19 diin ubay-ubay na ka mga kalingawan ang nahulma sama sa Dance Contest, Daygon Contest, ug Film Showing.

Nagpadayon usab ang Belen Contest sa nahisgutang barangay ug ang kalihukan tak-upan karong Disyembre 23, diin mahitabo ang Christmas Disco Party nga ipahigayon gihapon sa Kalunasan Sports Complex. Suma pa ni Konsehal Leyson nga iyang gipasigarbo ang maong kalihukan gumikan kay dinhi makita ug mabaid pa ang mga talento sa mga kabatan-onan sa Kalunasan sa natad sa pagsayaw, pagkanta ug uban pa. (BANAT NEWS)