Christian sa Indonesia magpapalipas ng Valentine

MANILA, Philippines - Kakantahan ni Christian Bautista ang kanyang mga fans sa Indonesia sa Valentine dinner concert niya sa Times Square, Grand Indonesia Shopping Town, Jakarta, bongga di ba sa Indonesia ang concert niya?

Parang dito rin sa ‘Pinas, bandang alas-7:00 ng gabi (Jakarta time) ang simula ng concert ngayong gabi, Friday.

Kahit nakabase dito sa Pilipinas si Christian, napanatili niya ang kanyang musical career sa Indonesia mula nang lumabas ang kanyang breakout single na The Way You Look at Me na naging mabenta sa naturang bansa at madalas patugtugin ng mga Indonesian radio station simula pa noong 2004.

Marami nang beses nagpabalik-balik si Christian sa Indonesia para mag-promote ng album at mag-concert. Lumabas din siya bilang guest sa Indonesian Idol ng RCTI. Bukod pa rito ang pagtatanghal niya sa First Asian Beach Games sa Bali at isinahimpapawid ng Trans TV at paglabas niya sa mga Indonesian TV commercial.

Habang nasa Jakarta ngayon si Christian, lalabas siya sa MTV Ampuh ng Global TV at sa Valentine’s episode ng Dashyat na napapanood sa RCTI. Ang Dashyat ang kasalukuyang top rating show sa telebisyon sa naturang bansa.

Sa ‘Pinas kasama siya sa Pops Icons.