Dongyan vs. Kimerald!

Mabulukon ang mahitabong TV viewing karong gabii sa Pilipinas. Kini tungod kay magsungag ang duha ka mga programa nga gibitoonan sa mga mainit nga bituon karong panahona. Number one primetime show sa ABS-CBN ang “Tayong Dalawa” nga gibidahan nila ni Kim Chiu ug Gerald Anderson o mas naila ngadto sa ilang mga fans isip Kimerald, ang team-up nga gikagubtan dili lang dinhi sa Pilipinas kundili hasta na sa Taiwan ug uban pang mga nasud gumikan sa sikat nila nga serye “ Sana Maulit Muli.” Misamot ang ilang kahumot dihang nasublian ang ilang team-up pinaagi sa Pinoy adaptation sa sikat nga Koreanovela My Girl. Na semento ang popularidad sa duruha, ug mas milig-on ang suporta sa mga advertisers nila, hinungdan nga dili na kahibudngan nga sa ilang pagbalik sa primetime pinaagi sa Tayong Dalawa, sila maoy nahimong labing kusog nga teleserye karon sa Kapamilya network sulod na sa duha ka semana human kini nagsugod.

Ug tungod kay sila maoy labing kusog, naturalmente nga sila maoy sungagon sa mobalik nga “phenomenal love team” nila ni Dingdong Dantes ug Marian Rivera, ang panagpares nga responsabli sa back to back hits Marimar ug Dyesebel sa GMA-7. Welcome to “Ang Babaing Hinugot Sa Aking Tadyang” pilot episode karong gabii. Ang Dongyan team-up giisip nga labing lig-on karon nga panagpares sa telebisyon, sanglit pareho silang duha nga nakapahimos sa ilang kasikat pinaagi sa daghang product endorsements nga naangkon sukad sa una nilang panag-uban hangtud karon.

Ug ingon niini pod ang “appeal” sa Kimerald—daghang fans ug paborito sa mga advertisers.

Karong gabii masukod ang tanan human sa May Bukas Pa nga musunod dayon human sa TV Patrol World sa ABS-CBN, samtang human usab sa Luna Mystika sa GMA-7!

Pwes, kinsay motuyhakaw nga team-up? Kinsay motik-op nga bidlisiw? Buckle up and be part of this interesting collision, nga atong isipon isip Dongyan vs. Kimerald!