KC-Chard suod na kaayo, dili uyab

Pareho nga malipayon sila si KC Concepcion ug Richard Gutierrez sa dihang gipangutana kini sa mga TV reporters human sa ilang presscon sa nagsingabot nga pelikula nga giuloha’ng “When I Met You”. Gipangutana ang duha kong unsa na ang estado sa ilang relasyon karon, ug kinsa ang ilang mga nakarelasyon kaniadto, apan consistent kini nga mitubag nga malipayon sila kong unsa man ang relasyon nga anaa tali nilang duha. 

Dungag pa nga enjoy kaayo sila nga gisaw-an ang mga panahon nga nagkauban sila sa Coron, Palawan, ug usa kini sa mga unforgettable moments nilang duha. Wala usab nila ilimod kong unsa man ang nahitabo nila human sa maong higayon. Mulugwa usab sila sa mga shows sa GMA ug ABS-CBN aron I-promote ang When I met You nga Valentine movie presentation sa GMA Films ug Regal Entertainment ubos sa direksyon ni Joel Lamangan. 

Pasaylo, Saad, Paningkamot

Human nahimong publicist ni Marian Rivera, gidapit dayon ni manay Lolit Solis ang kadaghanang sakop sa entertainment press sa kaulohan alang sa usa ka presscon nga nahimong “ bull session” tungod kay gipahungaw sa mga writers ang ilang kahiubos ngadto sa aktres.

Dinhi na nangayo og pasaylo si Marian sa tanan nga iyang napasakitan ug misaad nga dili na mahitabo ang nahitabo nga nakapahiubos sa kadaghanan ilabi na matud pa sa mga fans niya. Giklaro niya nga kung duna man gani siyay wala mahatagi og higayon aron magpa-autograph o magpa-picture, kadto tungod kay kanunay siyang nagdali tungod sa kadaghan sa iyang mga trabaho.

Samtang nakit-ang nag-date ug sweet kaayo si Marian Rivera uban si Dingdong Dantes sa usa ka restaurant, ug nakit-an usab kini nga nanga-on sa Rockwell niadtong Biyernes. Matud pa sa dalaga nga tinuod nga nag-uban sila ni Dingdong, apan kini wala nagpasabot nga nag-date sila. Na-atlan lang matud pa nga pareho sila nga free atong mga panahona ug mitawag kaniya ang aktor, pero Oliver Sandwhich ra ang ilang gikaon.

Ug sa dihang gipangutana kini kong aduna bay posibilidad nga ma-inlove siya sa aktor? Pwes, gi-angkon ni Marian nga open ang iyang doors alang kang Dingdong ug dako gyud ang posibilidad nga ma-inlove siya niini, sanglit halos tulo na ka tuig sila nga nag-uban isip love-team.

Giklaro usab niya nga wala silay date ni Dingdong karong Valentines Day sanglit lakip man sila sa mga guests sa umaabot nga concert nila ni Regine Velasquez ug Ogie Alcasid karong Pebrero 7, sa University of Guam nga giulohang “The Singer and the Songwriter, uban si Manny Pacquiao. Sa laing bahin, ang “Babaeng Hinugot sa Aking Tadyang” sugdan na karong Lunes, Pebrero , sa GMA 7 nga pagabidahan usab sa duruha.

Giklaro pod ni Marian nga nagsugod lamang sila og gawas-gawas ni Dingdong aron mangaon o manuroy, human sa panagbuwag sa aktor ug ni Karylle.

Samtang nabuking sa PangMasa nga James Bond watch diay ang regalo ni Marian kang Dingdong niadtong Pasko. Gibutyag pod ni Manay Lolit nga dunay gipahimong apartment units si Marian sa Cavite nga iyang pa-abangan.

Sa pikas bahin giangkon na ni Marian nga ang Ginebra San Miguel calendar gyud ang rason sa panagbuwag nila ni Ervic Vijandre tungod kay conservative matud pa ang pamilya sa basketbolista. Duha sila ka semana nga nag-away, una sila nagbuwag ug gihimo niya ang calendar tungod kay dugay na kaayo kining offer ug dili kini bastos tan-awon. Giklaro niya nga wala siya papilia ni Ervic kun career ba o ang ilang panag-higugmaay.

Katapusan nga nasayran ni Marian kalabot ni Ervic mao nga interesado kini nga musalmot sa Pinoy Big Brother sa ABS-CBN.

Mga laki ni Rufa Mae way reklamo sa billing

Walay reklamo ang ubang leading men ni Rufa Mae Quinto sa hugyaw nga billing ni Jon Avila sa poster sa pelikulang Status Single. Dunay “and” before ang name ni Jon busa naintriga ang mga himantayon. Pero matud pa nila ni Rafael Rosell, Mark Bautista ug Alfred Vargas, its never an issue.

Rhian, haba-haba ng hair

“Inspired” si Rhian Ramos sa iyang leading man nga si JC de Vera, pero dili pa sila uyab. Kini maoy giklaro sa dalaga niining bag-o lang. Pero giangkon niya nga nabag-ohan siya sa iyang gibati. In other words feeling ang haba-haba ng hair niya sa kiliran ni JC karon.

Gladys gimingaw og daog-daog ni Juday

Wish ni Gladys Reyes nga subling makauban ang iyang suod nga higala nga si Judy Ann Santos sa usa ka project. Komedya pa niya gimingaw na siya og daog-daog ni Juday tungod kay taod-taod na ang katapusan nilang panag-uban. Giklaro pod niya nga bisan duna na siyay duha ka anak, bukas siya sa kontrabida role nga makalagot gyud, sukwahi sa iyang role sa La Lola nga buotan. Human sa La Lola, Totoy Bato ang next project ni Gladys.

Enchong duha ang soaps

Bisan crush niya si Kim Chiu, happy na si Enchong Dee para sa dalaga ug ni Gerald Anderson nga miangkon nga duna nay mutual understanding. At least niya, nakauban niya si Kim sa softdrink commercial kauban pod si Shaina Magdayao. Duha ka soaps ang gitakdang himuon ni Enchong—Maruja ni Kristine Hermosa ug ang Ikaw Lamang nila ni Kristine ug Jericho Rosales. Graduating na si Enchong sa Political Science course sa De La Salle University.

Nyoy ganado tungod sa uyab

Ganahan kaayo motrabaho si Nyoy Volante karon tungod sa bag-o niyang non-showbiz girlfriend nga mapasigarbuhon niyang gihulagway nga buotan kaayo nga babaye. Tsika pa niya, mikuyog ra sa iyang higala ang maong babaye nga mitan-aw sa iyang show, gipaila-ila sila sa usag-usa, nag-date hangtud nga nagkasinabot.