Dili malimtang mga istorya sa 2008

Kalit Nga Kamatayon Ni Marky

Nakugang ang nasud human kalit nga nakit-ang patay ang promising young actor nga si Marky Cielo niadtong Disyembre 7 sa pangidaron nga 20 anyos ug malinawon nga mipahuway sa tugkaran sa ilang kaugalingong panimalay sa Sinto Bauko , Mountain Province sa miaging Disyembre 15.

Mahinumduman nga sa gipagawas nga initial report sa kapulisan, wala na’y kinabuhi ang aktor samtang siya natulog sa ilang balay sa Antipolo City sa dihang misulod ang inahan niini aron siya pukawon alang sa charity event nga unta pagatambungan sa aktor. Busa dali kini nga gidala sa Antipolo Doctors Hospital apan gideklara kini nga dead on arrival. Ang pamilya ni Marky padayong mihangyo sa publiko sa pag-respeto sa ilang privacy aron sa kalinaw sa kalag ni Marky ug sa tibouk niining pamilya. Dunay mga pagduda nga naghikog ang aktor tungod sa depresyon.

Cristy Fermin, Gi-Suspenso

Nasuspenso ang controversial TV-Radio host ug kolumnista nga si Cristy Fermin sa programang The Buzz sa ABS-CBN. Sa official statement sa ABS-CBN, gipasabot sa network nga ang hinungdan sa suspension sa kontrata ni Cristy adunay kalabutan sa mga pamahayag niini batok sa aktres nga si Nadia Montenegro niadtong Oktobre 5 sanglit matod pa nga nadamay ang mga inosenteng batang walay kalibutan sa maong kontrobersya. Kini mao ang walay preno nga pamahayag ni Cristy nga dunay anak si Nadia nga dili dugo sa iyang longtime live-in partner nga si Boy Asistio.

Rudy, Mitaliwan

Mipanaw ang beteranong aktor ug kapikas sa kinabuhi ni Lorna Tolentino nga si Rudy Fernandez niadtong Hunyo 7 sa edad nga 56.

Si Daboy misurender na sa iyang pakigbisog sa sakit nga periampullary cancer nga milungtad og pipila ka mga buwan.

Mahinumduman nga sa wala pa mahitabo ang pagtaliwan sa aktor, mibakasyon ang managti-ayon sa US aron usab pag-konsulta og mas experto nga mga espesyalista.

Ang aktor gilubong sa The Heritage Park sa Taguig City niadtong Hunyo 12.

Kc-Richard Movie Nahulma

Mikulit og kasaysayan sila si KC Concepcion ug Richard Gutierrez human misugot ang duha ka magkaribal nga networks—Kapamilya ug Kapuso—nga mohimo sila og pelikula ubos sa Star Cinema. Isip bugti, mohimo pod og laing pelikula ang duruha alang sa GMA Films diin nagpadayon na ang shooting niini.

Dingdong vs. Richard

Mibukal ang kompetisyon nila ni Richard Gutierrez ug DingDong Dantes, human usab mas gi-abibahan sa Bench fashion show ang nauwahi. Mibahad si Annabelle Rama nga iyang ipatangtang isip endorser sa maong clothing company ang iyang anak, dungan usab sa paglutaw sa tsismis nga mobalhin na sila sa ABS-CBN. Apan human sa pipila ka adlaw, nahilom ang isyu ug nagpabilin si Chard isip Kapuso.

Gabby-Shawe, Nagka-Uli

Bisan sa daghang gisagubang nga mga kontrobersya ni Gabby Concepcion tali sa former talent manager niini nga si Rose Flaminiano ug sa pagpanaw sa iyang amahan, aduna gihapoy daghang rason nga magmalipayon ang aktor ug usa niini mao ang nauling guba nga relasyon sa iyang kanhi asawa nga si Sharon Cuneta. Matod pa ni Gabby nga bisan og wala pa sila magkita sa megastar, kanunay na sila nga mag-communicate niini pinaagi sa tawag o text.

Kini human usab sa kontrobersiya nga gimugna ni Gabby diin gitakda na siya nga mohimo og pelikula sa GMA Films isip comeback movie human sa 13 ka tuig nga pagkahanaw, apan sa ganghaan siya sa ABS-CBN midayon ug mipirma og kontrata.

Video Ni Marian

Diriyot mahagba ang estado ni Marian Rivera isip labing init nga bituon sa 2008 human migawas sa You Tube ang video diin gipakita nga iyang giayo-ayo og kasaba ang usa ka lalake nga fan nga mitekang sa set sa Dyesebel. Sa ngadto-ngadto nalampusan ni Marian ang kontrobersiya tungod usab sa walay puas nga pagpaluyo sa iyang mga fans ug sa network diin siya maoy rayna.

Engagement Ni Judai-Ryan

Nahugyaw ang kadaghanan sa dihang pormal na nga gipahibawo sa manag-uyab nga sila si Judy Ann Santos ug Ryan Agoncillo ang ilang engagement nga exclusive nga gimantala sa YES Magazine July Edition. Ang duha pareho nga mi-desisyon “to take things slowly” alang sa kaugmaon nila isip manag-tiayon.

Nahitabo ang romantic kaayo nga engagement sa dihang nag-propose si Ryan atol sa birthday ni Judy Ann nga gi-silibrar sa aktres sa Dumaguete, Negros Oriental niadtong Mayo 11. Usa ka milyon ka pesos ang kantidad sa engagement ring nga gi-order pa ni Ryan sa Hongkong.

Sarah Geronimo Misulbong

Solido nga nahulma ni Sarah Geronimo ang iyang estado sa showbiz industriya human sa wala damha nga kalampusan sa iyang pelikula uban ni John Lloyd Cruz, ang “A Very Special Love” nga mitay-og sa box-office diin giisip nga labing malampuson nga pelikula sa 2008. Una niini, nahulga ang maong pelikula tungod sa bahad sa fans nila ni John Lloyd ug Bea Alonzo nga i-boycott ang maong lilas sanglit wala sila makauyon nga gipares og lain ang actor, imbes nga ang perennial love team niini nga si Bea.

Jennylyn, Dulot Sa Bukog Ang Kasilag

Nanganak ang young aktres nga si Jennylyn Mercado sa bunga sa nagusbat nga relasyon nila ni Patrick Garcia niadtong Agosto.

Mihimugso si Jen og usa ka himsog nga batang lalake. Ug sa dihang gipangutana ang aktres kong iya bang tugutan ang amahan sa bata nga si Patrick nga makita ang bata, “No! kahit lumuha pa siya nang dugo!”, ang daling tubag ni Jen.

Vina Morales, Mabdos

Nakumpirmar nga nagsabak si Vina Morales diin iya kining gi-angkon niadtong Nobyembre. Nasayran nga ang singer-actress duha na ka-buwan nga nagsabak, ug ang amahan, mao ang usa ka Chinese businessman nga si Cedric Lee nga hangtod karon gi-proseso pa ang annulment sa kanhi asawa niini. 

Raymond Bagatsing Nagpakasal Ngadto Sa 60 Anyos

Daghan ang nakuratan sa pagpakasal sa aktor nga si Raymund Bagatsing sa ikaduhang higayon sa Amerika. Ang gikagubtan sa kadaghanan mao ang iyang pagpakasal sa 60-year-old columnist nga si Cora Pastrana nga manunulat sa tulo ka Filipino-American newspapers sa US.

Gipahigayon ang ilang kasal niadtong Nobyembre 21 sa Gateway Sheraton Hotel sa Los Angeles California.

Nasayran nga ang duha tulo na ka tuig nga managhigala, ug gani usa sa principal sponsors sa duruha mao si President Gloria Macapagal-Arroyo.

Kahinumduman nga uwahing nakita sa telebisyon si Raymond sa GMA-7 fantasy series nga Encantadia: Pag-ibig Hanggang Wakas niadtong 2006.

Janina San Miguel’s Boo-Boos

Nakugang ang kadaghanan sa malampusong paglangkat ni Janina San Miguel sa gipahigayong Bb. Pilipinas 2008 diin siya nakoronahan isip Bb. Pilipinas- World sanglit nasud-ong sa katawhan ang iyang pagpataka og sulti sa pinulungang English sa question and answer portion sa maong indigay niadtong Marso 9.

Mas daghan ang nakurat sa dihang iyang giwakli ang higayon sa pakig-indigay sa laing nasud aron i-representar ang Pilipinas, ug nagbunga kini og daghang mga spekulasyon.

Ang gihimong rason ni Janina sa pagsalindot sa korona ug pag-atras sa maong indigay mao ang pagkamatay sa iyang apohan.

Suma pa sa giluwatang pamahayag ni Janina mao ang dili niya pag-apil sa natad sa showbiz world sanglit nagtuo siya nga daghan kaayong dili tinuod nga tawo ug plastik.