Gabby labihan ang kaguol

Mipanaw na ngadto sa laing kalibutan ang amahan ni Gabby Concepcion nga si Rollie Concepcion niadtong miaging Martes sa gabii (September 23) sa Lourdes Hospital tungod sa sakit sa kasingkasing. Kahinumduman nga dugay na nga nag-antos sa maong sakit ang nahisgutan nga maoy hinungdan nga mipauli sa nasod si Gabby pagkahuman sa 13 ka tuig nga pagpuyo niini sa Amerika. Nasayran nga igo ra gipaabot nga makauban ang actor sa amahan niini og pipila ka bulan gikan sa pag-abot niini sa nasod ug wala madugay namatay na gyud kini. Matod pa nga gikaguol gyud ni Gabby ang nahitabo sa iyang amahan mao nga hangtod karon wala pa kini mihatag og statement ngadto sa entertainment press. Samtang, kagahapon aduna untay taping ang actor sa “Iisa Pa Lamang” apan tungod sa nahitabo, gikansel sa maong produksiyon ang nahisgutang taping isip paghatag og respeto sa amahan niini nga namatay. Tsika sa PangMasa nga nagpas-an karon sa tumang kasakit ang nahisgutang actor tungod sa pagpanaw sa amahan niini ug sa kaso nga atubangon niini nga gisang-at sa manager sa nahisgutan nga si Mommy Rose Flaminiano. Sa laing bahin, mipadangat sa iyang pahasubo ang nahisgutang manager ngadto sa namatay nga amahan ni Gabby ug matod pa gikasubo gyud niini nga namatyan og edaran nga Concepcion ang problema nila sa actor. Ug matod pa nga moduaw si Mommy Rose sa haya ni Rollie apan gusto niini nga buntag kini moadto aron pagseguro nga wala kaayoy tawo ug aron wala pud si Gabby. Giangkon usab sa nahisgutang manager nga dili siya gusto nga mag-estorya karon kalabot sa kaso nila ni Gabby isip pagrespeto sa namatay nga amahan niini.

Jayson pulihan ni Ronnie

Gihimakak sa usa sa mga casts sa “I Love Betty La Fea” nga si Jayson Gainza ang tsika nga wagtangon na siya sa maong serye. Gidala ni Jayson ang papel sa usa ka HR manager diin matod pa ang pagsulod ni Ronnie Liang ang mohulip niini sa pagdala sa maong role. Ug matod sa nahisgutan nga tinuod nga si Ronnie ang mohulip kaniya isip HR manager sa maong serye apan dili hingpit nga mawagtang ang iyang papel diin magpabilin lang gihapon siya sa “I Love Betty La Fea” apan assistant na lang ni Ronnie tungod sa iyang pagka-manyakis sa mga babaye. “Ang maganda rito, magkakaroon ng contrast ang character namin ni Ronnie dahil seminarista siya at ako naman ay babaero,” matod pa ni Jayson.