Si Madame Rose Lim na lay nahibilin

Before anything else na sad mga Manash, our heartfelt condolence ngadto sa bereaved family ni anhing Renato “William” Enriquez nga dili pa dugay, mipanaw sa laing kalibutan tungod sa usa ka aksidente diha na sad sa SRP, hinungdan nga daghang nag-ingon nga ang SRP kono usa ka”Buhisan” tungod kay kinahanglan gyod kono magbuhis ang dakbayan sa Sugbu og usa ka tawo nga moagi diha matag karon ug unya. Kun dili matapos ang away nilang Mayor Osmeña ug Congressman Eddiegul, or, ang away nilang Mayor ug ni Gob. Remember Ely Carungay? Pastilan! Ang nakaparat, mga sakop sa media ray ibuhis, di ba?  Si anhing Ely mediaman ug si anhing Renato, artista. Artista ra diay gusto sa mga dili ingon nato diha?

Condolence pod ngadto sa usa sa akong mga benefactress nga si Madame Rose Lim sa Lim’s News and Magazine Center diha sa silong sa Ultravistarama Theater kay dili pa sad dugay mipanaw sa laing kalibutan ang iyang dad. Unsaon man, dili man gyod ta makabuot sa gidugayon sa atong pagpuyo niining kalibutan? Gani, may mga bata mang kuhaon og sayo si Lord, unya duna say moabot sa pagka senior citizen. Maayo na la’g mga bata ang mga mamatay kay dili problema sa syudad. Ang mga senior citizen labi na’g pobre, problema kaayo’s syudad, kay ang mga tiguwang sad, labaw pa ka paraygon kay sa mga bata.

Anyway, advance happy birthday na lang pod ngadtong Maam Rose Lim nga, molapas na sad sa kalendaryo karong sunod buwan [walay petsa aron kono way mga regalo]. Remembering sa mga katuigang nanglabay, dili baya si Maam Rose maoy suki nako kaniadto sa mga magasin, mga komiks, mga newspaper ug uban pa. Ang suki nako kaniadto mao ang Ybanez News and Magazine Center diha sa atbang sa Colonade, duna pay duha ka sinehan diha kaniadto, pero gilaayan na ang mga anak busa, nag-distributor na lang sila, wa na sila mag-display, Ug karong panahona, si Madame Rose na la’y nahibiling naay display center diha sa Colon. Sa pagka wagtang sa mga komiks misamot ka mingaw ang mga display centers, busa nanira na gyod, pero si Maam Rose, milahutay, ug karong gipabalik nilang Carlo Caparas ug Donna Villa ang mga komiks, si Maam Rose na la’y nag-display niining mga komiks nilang Carlo Caparas ug Donna Villa.  Kudos, Maam Rose, ug more power, ug again, advance happy birthday.