Jean at Gardo, nagdedmahan!

Naniniwala na akong may namamagitan na kina Erich Gonzales at Search For The Star In A Million finalist Jay Perillo. Nadadalas silang magkasama lately. Kamakailan ay nakita ko silang nagdi-dinner sa Windows Café sa The Loop ng ABS-CBN. Minsan na rin silang nabalitang nag-date sa Eastwood sa Libis naman.        

Cute naman silang pagmasdan together. They look good together. Mahina ang kanilang boses habang nag-uusap. Panay ang bulungan nila.        

Napansin ko na ang ganda-ganda ngayon ni Erich. Dalaga na ito. But she is only 15. Masyado pang maaga para makipagrelasyon. Jay naman is 18.        

Nakakatuwa ang kwento kina Erich at Jay. Magkasama ang dalawa sa 2nd batch ng Star Circle Quest. Hanggang sa ma-eliminate si Jay at si Erich naman ang tinanghal na grand questor. Ngayon, nagkrus na naman ang kanilang landas. But this time, romantically na.        

Matuloy kaya sa isang seryosong relasyon kung anuman ang namamagitan ngayon kina Erich at Jay?

* * *

Narinig ko sa ilang tao na lumipat na si John "Sweet" Lapus sa Channel 11. Ang nakarating sa aking balita, isang bagong show ni Sweet ang nakatakdang i-launch ng said network.  Nagkataon namang nakasalubong ko si Sweet sa The Loop ng ABS-CBN noong weekend. Galing ito sa pictorial para sa kanyang Sweetalk sa ABS-CBN Interactive.        

"Actually, hindi lang ikaw ang nagtanong sa akin niyan, marami na," reaksyon nito.

Ipinaliwanag sa akin ni Sweet ang totoo sa isyu.        

"Actually, tumawag sila (Channel 11) sa Star Magic (his talent agency)," simula nito. "They asked for my resume. My handler Alan (Real), prepared it at ipinadala sa kanila. ‘Yun lang ‘yon."        

Ani Sweet, walang malinaw na negotiations between Star Magic at Channel 11. "As in wala. Nag-submit lang kami ng resume. Gano’n."        

Umugong ang balitang lilipat si Sweet sa ibang network dahil sa totoo lang, wala siyang regular show sa ABS-CBN, his home studio. He is seen in ETK tuwing Sabado pero VTR’s lang ang mga ito.        

* * *

‘Di ko mabilang ang mga artistang dumalo sa birthday party ni Wenn Deramas sa Clubhouse ng Tivoli Royale noong Sabado ng gabi. Late na rin akong dumating kasama sina Louie Andrada, Mosang at Roxy Liquigan dahil tinapos ko pa ang nomination night ng Pinoy Big Brother. Masaya ang party. Halos lahat ng mga malalapit na kaibigan ni Wenn ay present. May nagbulong sa akin na halos hindi nagpapansinan sina Jean Garcia at Gardo Versoza noong una. Pero habang tumatagal ang gabi ay nag-uusap na rin ang dalawa.      

Ninety five percent ng mga dumalo ay nakasuot ng green. ‘Yun kasi ang request ni Wenn sa kanyang guests. ‘Yun ay para mawala ang kanyang birthday blues. Sa totoo lang, ang saya-saya ng party ni Wenn.