F4 fans, dismayado sa gallery exhibit

Marami sa mga avid fans ng F4 na kinabibilangan nina Jerry, Ken, Vic at Vaness ang dismayado sa on-going SM Mall gallery exhibit ng F4. Anila, masyadong komersyal at sobrang pagnenegosyo o pananamantala na ang ganitong uri ng gimik para sa kanilang iniidolo.

Para makapasok ka sa nasabing gallery, kinakailangan mong bumili muna ng isa sa mga sumusunod: "Meteor Rain" CD 7 Cassette, "Meteor Rain" Karaoke & VCD, "Music Party" VCD Live In Taiwan, "Fantasy 4ever" CD & Cassette, "Fantasy Live In HK" CD & Cassette or VCD, "Meteor Garden Series" (Box Set) VCD, "Meteor Rain Series" (4 et) VCD, "Meteor Garden Original Soundtrack", "Vaness Body Will Sing" at "Make A Wish" CD & Cassette na pawang distributed ng Sonny Music.

Para naman manalo ka ng poster at CD ng F4, kailangan naman makabili ka ng Pepsi Cola in cans. At sa pagbili mo ng alinman sa mga CD, may additional raffle stub ka pa na kung susuwertihin ka ay maaari kang manalo ng trip to Hongkong plus makakadalo ka sa Victory Pepsi Party.

On-going pa rin ang kanilang mga exhibit sa SM Megamall (Aug. 24-28), SM Southmall (Aug. 29-Sept. 1), SM Bacoor (Sept. 2-6), SM North (Sept. 7-12).

Pero ano ba ang makikita sa Gallery ng F4, well puro litrato lang naman nila. Mas mainam pa nga ’yung video na pinapalabas sa labas ng gallery. — Boni A. Casiano