Bakit umiyak-iyak si Yda ?

Nagulat ang mga dumalong press people sa presscon ng Haplos nang ang bidang babae na si Yda Manzano ay bigla na lamang umiyak. Maging ang producer ng movie na si Jojo Galang ay nagulat sa hindi inaasahang pag-iyak ni Yda. Sabi nga tila yata wala sa script yung pag-iyak ng kanyang leading lady.

Si Yda rin ang nagpaliwanag sa kanyang ginawa. Bigla palang naalaala niya, yung mga kalungkutang naranasan noong wala pang nakakapansin sa kanya. May nagbigay nga raw ng kontrata sa kanya pero, halos ipapasan naman sa kanya ang daigdig, dahil wala siyang kinikita. Kapag may mga nag-aalok sa labas, ayaw naman siyang payagan. Sa bandang huli, saka lang daw niya nalaman na pinababayaran sa kanya ng thirty thousand yung hinihingi niyang kalayaan. Wala pa naman daw siyang kapera-pera noon. Mabuti na lang, dumating si Jojo Galang sa buhay niya at binigyan ng pambayad sa kontrata, makalaya lang. Saka siya binigyan ng movie, ang Haplos na dinirek ni Boy Vinarao. Masaya na si Yda, malaya na niyang puntahan at tanggapin ang mga iniaalok sa kanya. Ginastusan din ng libu-libo ang promo ng Haplos na naka-apat ng presscon pa.