Trike driver pinabulagta sa daan
NABUA, Camarines Sur, Philippines — Bulagta sa tabi ng kalsada ang isang tricycle driver matapos pagbabarilin ng hindi nakilalang gunman sa tabi ng kalsada sa Zone-1, Brgy. La Opinion, Nabua, Camarines Sur kamakalawa ng gabi.
Sinubukan pang isugod ng mga rumespondeng rescue team ng Bureau of Fire Protection sa MMG Hospital pero hindi na umabot nang buhay ang biktima na kinilalang si Ronie Llaban Ibo, 47-anyos, may asawa at residente ng nasabing lugar.
Sa ulat na nakarating sa Camp Gen. Simeon Ola, dakong alas-7:20 ng gabi habang nakatayo ang biktima sa tabi ng kalsada nang biglang sumulpot ang suspek sa harapan nito.
Bago pa nakakilos ang biktima ay mabilis na bumunot ng hindi malamang kalibre ng baril ang suspek at sa hindi malamang dahilan ay walang kaabog-abog na pinagbabaril ito sa iba’t ibang bahagi ng katawan.
Patuloy ang ginagawang imbestigasyon ng mga pulis para malaman ang motibo at pagkakakilanlan ng suspek.
- Latest
