3 holdaper todas sa shootout!

NORTH COTABATO, Philippines — Bumulagta ang tatlong pinaghihinalaang holdaper matapos na makipagbarilan sa mga pulis nang kumasa habang inaaresto sa Yapsea Street, Brgy. RH-10, Cotabato City, hapon nitong Biyernes. 

Kinilala ang dalawang napatay na suspek na sina Boy Ali Dilalagan Lumilis alyas Boy, 23-anyos at Jordan Abdullah, nasa hustong gulang habang patuloy na inaalam ang pagkakakilanlan ng isa pa nilang kasamahan. 

Ayon kay P/Captain Rostum Pastolero, hepe ng Police Station 2, una silang tumanggap ng impormasyon na may tatlong kalalakihan umano na sakay ng Bajaj motorcycle na may kahina-hinalang ikinikilos sa nasabing lugar, pasado alas-5:00 ng hapon. 

Agad na rumesponde ang pulisya at naaktuhan ang tatlong suspek na nanghoholdap habang nakatutok ang baril ng isa sa kanila sa isang payong-payong driver na may sakay na mga estudyante.

Nilapitan ni Pastolero ang mga suspek pero nagpaputok ng baril ang isa hanggang sa mauwi sa shootout.

Dead-on-the-spot sa insidente ang isang suspek habang nagawa pang maisugod sa ospital ang dalawa pero idineklara silang dead-on-arrival.