63-anyos tinadtad ng 60-anyos

Legazpi City, Albay, Philippines – Patay sa harap ng kanyang bahay ang isang 63-anyos na lolo matapos na pagsasaksakin ng kanyang kainumang isa ring senior citizen makaraang magkaroon ng pagtatalo sa gitna ng kanilang kasayahan sa Purok-7, Brgy. Bitan-O sa Sorsogon City, Sorsogon kamakalawa ng gabi. Ilang saksak sa katawan ang agad na ikinasawi ng biktimang si Romy Montes Doctor, residente ng nasabing lugar habang tinutugis na ang tumakas na suspek na si Salvador Canielas Reyes, 60-anyos ng Brgy. Lipaat, Bulan. Sa ulat, dakong alas-8 ng gabi, nakitang nag-iinuman sina Doctor at Reyes sa bahay ng una. Gayunman, nang malasing ay nagtalo ang dalawa dahilan para lumabas ng kanyang bahay ang biktima para sana magpalamig pero nilapitan siya ng suspek at biglang pinagsasaksak. Duguang bumagsak ang biktima dahil sa malalalim na sugat sa katawan habang tumakas ang suspek patungo sa hindi malamang direksyon.