3 utas sa bumaliktad na truck

NORTH COTABATO, Philippines – Tatlo-katao ang magkakasunod na sinalubong ni kamatayan habang siyam naman ang nasugatan makaraang bumaliktad ang dump truck sa kahabaan ng highway sa Barangay Pansod, bayan ng Lebak sa Sultan Kudarat noong Sabado ng hapon.

Patay matapos mabagsakan ng kargamentong rounbars ang tatlong biktima na sina Artemio Buscato Campong ng Brgy. Pinaring; Jojo Digos, 48; at si Dodong Garcia, 53.

Sugatan naman ang drier ng truck na si Balabagan Abas at walong iba pa na naisugod sa ospital.

Ayon kay SPO2 Erwin Dable, patungong Barangay Kinuladan ang dump truck na may plakang MJE 494 nang biglang mawalan ng preno kaya naisalpok ng driver sa gilid ng bundok saka bumaliktad.

Nabagsakan ng kargamentong bakal ang mga biktima kung saan tatlo kaagad ang namatay habang pinag-aaralan ng pulisya ang pananagutan ng may-ari ng truck na White Yang Construction ni Engr. Abdulnaser Usman.